Tags-Dil

is se kyā matlab ki hai kis kis ke dil meñ shauq-e-qatl
dekhnā ye hai ki dam kitnā tire ḳhanjar meñ hai

is qadar bhī dil nahīñ TuuTā huā
kuchh simaT saktā na ho bikhrā huā

kab talak ḳhud ko yahī kahtā rahūñ
dil pe mat le jo huā achchhā huā

sab marāsim rakh gayā dahlīz par
dil giraftār-e-anā hotā huā

hikāyat-e-ishq se bhī dil kā ilaaj mumkin nahīñ ki ab bhī
firāq kī talḳhiyāñ vahī haiñ visāl kī aarzū vahī hai

nazar aa.eñ tire chehre ke ḳhad-o-ḳhāl tamām
dil se uTh jaa.eñ kabhī vahm ke saa.e to bane

hamesha ham se kudūrat rahī hasīnoñ ko
na dil se nikle kabhī vo ġhubār ham bhī haiñ

sadqe dil-o-jigar ko mizhgāñ pe kar chukā huuñ
maiñ ne to apne hāthoñ kāñToñ pe phuul Daale

sarfaroshī kī tamannā ab hamāre dil meñ hai
dekhnā hai zor kitnā bāzū-e-qātil meñ hai

aaj phir maqtal meñ qātil kah rahā hai baar baar
aa.eñ vo shauq-e-shahādat jin ke jin ke dil meñ hai

māne-e-iz.hār tum ko hai hayā, ham ko adab
kuchh tumhāre dil ke andar kuchh hamāre dil meñ hai

vaqt aane de dikhā deñge tujhe ai āsmāñ
ham abhī se kyuuñ batā.eñ kyā hamāre dil meñ hai

ab na agle valvale haiñ aur na vo armāñ kī bhiiḌ
sirf miT jaane kī ik hasrat dil-e-'bismil' meñ hai

dil ko ik sūrat bhaa.ī thī is amboh meñ par ham ne
jaane is afrā-tafrī meñ kis kī samt ishāra kiyā

kisī se rabt baḌhā.eñ tū mat ḳhafā honā
ki dil meñ ab tirī yādoñ kā silsila hī nahīñ

bichhaḌne vāloñ meñ ham jis se āshnā kam the
na jaane dil ne use yaad kyuuñ ziyāda kiyā

dayār-e-ishq hai ye zarf-e-dil kī jāñch hotī hai
yahāñ poshāk se andāza insāñ kā nahīñ hotā

ye mere jazb-e-nihāñ kā hai mo.ajaza shāyad
ki dil meñ jhāñk ke dekhūñ to tū hī tū nikle

shikast-e-dil kā baaqī ham ne ġhurbat meñ asar rakhā
likhā ahl-e-vatan ko ḳhat to ik gosha katar rakkhā

barābar ā.īne ke bhī na samjhe qadr vo dil kī
ise zer-e-qadam rakkhā use pesh-e-nazar rakkhā