Tags-Dil

kuchh is adā se ye dilkash sifāt chaltī hai
kisī ra.iis kī goyā barāt chaltī hai

us vaqt bhī ki ḳhātir-e-majmūa thī nasīb
kam-baḳht dil huā hai pareshāñ kabhī kabhī

vo tire nasīb kī bārisheñ kisī aur chhat pe baras ga.iiñ
dil-e-be-ḳhabar mirī baat sun use bhuul jā use bhuul jā

chāho agar amaan to hāzir hai merā dil
mazbūt hai ye qila darāḌoñ ke ba.ad bhī

ḳhudā jaane aapas meñ kyā pesh aa.e ye tāḳhīr-o-tājīl kyā rañg laa.e
hamārā irāda ki fauran na deñ dil tumhārī tamannā ki mil jaa.e jhaT-paT

bahut kuchh chhupāyā bahut kuchh bachāyā magar pesh-bañdī na kuchh kaam aa.ī
kiye ḳhanjar-e-nāz ne chaar TukḌe bil-āḳhir huā dil mohabbat meñ chaupaT

sitam bhī uThā.e hazāroñ tarah ke balā.eñ bhī jhelīñ hazāroñ tarah kī
huā tajraba ham ko ye dil lagā kar hasīnoñ se dil kā lagānā hai jhanjhaT

tire ishq meñ kyuuñ na maiñ dil ko ro.uuñ jigar ke liye kyuuñ na maiñ aah khīñchūñ
shab-o-roz kī muḳhtalif āfatoñ ne ise kar diyā chit use kar diyā paT

banā ġhairat-e-ā.īna dil hamārā ġhubār aa.e kyuuñ kar kudūrat rahe kyā
masal hai vo ḳhas-kam jahāñ paak vaalī na is ghar meñ kuuḌā na us ghar meñ karkaT

dīda-o-dil kī fazā par ġham ke bādal chhā ga.e
us ke jaate hī nigāhoñ ke ufuq sañvlā ga.e

dil to patthar ban gayā thā mom kis ne kar diyā
muddatoñ ba.ad aaj kyuuñ āñkhoñ meñ aañsū aa ga.e

thī sukūt-e-dil se pahle bazm-e-hastī par ḳharosh
phir vo sannāTā huā taarī ki ham ghabrā ga.e

be-hisī kā sard mausam zindagī par chhā gayā
dil meñ raushan the jo añgāre vo sab kajlā ga.e

sukūt-e-āḳhir-e-shab aur fasurdagī dil kī
bujhā bujhā sā tirī yaad kā diyā niklā

chhuriyāñ chalīñ shab dil o jigar par
la.anat hai is āh-e-be-asar par

junūn-e-dil na sirf itnā ki ik gul pairahan tak hai
qad o gesū se apnā silsila dār-o-rasan tak hai

maiñ kyā kyā jura.a-e-ḳhūñ pī gayā paimāna-e-dil meñ
balā-noshī mirī kyā ik mai-e-sāġhar shikan tak hai

na āḳhir kah sakā us se mirā hāl-e-dil-e-sozāñ
mah-e-tābāñ ki jo us kā sharīk-e-anjuman tak hai

dil kī har baat zabāñ par nahīñ aatī hai 'fahīm'
maiñ ne sochā hai ziyāda use likkhā kam hai

hairat-zada maiñ un ke muqābil meñ rah gayā
jo dil kā mudda.ā thā mire dil meñ rah gayā