Tags-Dil

maiñ nigāh-e-pāk se dekhe thā tire husn-e-pāk ko is pe bhī
mire jī meñ ḳhvāhish-e-vasl thī tire dil meñ bos-o-kanār thā

dil usī shaḳhs kī balā.eñ le
jis ke hone se sab balā.eñ haiñ

adāoñ ne lubhāyā dī nigāh-e-nāz ne dāvat
magar alfāz dil-shikanī meñ merī kāmrāñ nikle

ye vaqt-e-naz.a kaisā kaisī takmīl-e-hayāt ai dil
ummīdeñ kab huiiñ puurī abhī armāñ kahāñ nikle

dil se nikal na pā.egī mauj-e-havas ki bas
is tarah khīñchtī hai ye tār-e-nafas ki bas

ek ḳhvāhish kā mire dil meñ utarnā 'ashfāq'
ik sharāra ḳhas-o-ḳhāshāk meñ dekhā gayā hai

dhuup dil meñ faqat gumāñ bhar thī
abr āñkhoñ meñ āsmāñ bhar thā

ek sūrat nazar aa.ī thī abhī
dil ne tasvīr banā.ī thī abhī

ek sūrat thī ki dil hī dil meñ
ek sūrat se milā.ī thī abhī

sab kī āñkhoñ meñ nazar aane lagī
dil meñ sūrat jo chhupā.ī thī abhī

gudāz-e-sāġhar-o-paimāna kaun samjhā hai
mire sivā mire dil kī nazākatoñ ke sivā

kamī usī meñ tamannā.eñ jalva-gar thiiñ 'kamāl'
kuchh aaj dil meñ nahīñ hai jarāhatoñ ke sivā

jab nigāheñ laḌīñ nigāhoñ se
āñdhiyāñ uTThīñ dil kī rāhoñ se

terī rahmat ko rakh ke madd-e-nazar
dil ko bahlā liyā gunāhoñ se

vahī dil ke qarīb rahte haiñ
duur rahte haiñ jo nigāhoñ se

jab se dhoke diye haiñ dil ne mujhe
bach ke rahtā huuñ ḳhair-ḳhvāhoñ se

zarra zarra mahak uThā hai jigar
kaun guzrā hai dil kī rāhoñ se

asr-e-hāzir ne hamārā dil bhī patthar kar diyā
lāzmī hai ab vafāoñ ke chalan kī baat ho

mil ke baiThe haiñ to yaaro ab sunā.eñ hāl-e-dil
kuchh tumhāre dil kī ho kuchh mere man kī baat ho

dil par terī chup se lagne vaalā daaġh
aisā daaġh hai jis ko dho nahīñ saktā maiñ