Tags-Aadmi

kyā kahūñ darpai-e-āzār hai duniyā 'shāhīn'
aadmī qaid-e-zamāna se nikaltā hī nahīñ

har ek samt sarāboñ ke qāfile haiñ ravāñ
nazar nazar meñ bayābāñ hai aadmī ke liye

zarā qarīb se dekhūñ to koī raaz khule
yahāñ to har koī lagtā hai aadmī jaisā

ra.ūnatoñ meñ na itnī bhī intihā ho jaa.e
ki aadmī na rahe aadmī ḳhudā ho jaa.e

ta.alluqāt meñ gunjā.isheñ to hotī haiñ
zarā sī baat pe kyā aadmī ḳhafā ho jaa.e

kaun ab vāqif hai apne aap se
aadmī kab aadmī hai āj-kal

maiñ us aadmī se thā ham-kalām ki jo chhā gayā mire chār-sū
ise dil pe lenā na dosto, maiñ agar salām na kar sakā

mohara siyāsatoñ kā mirā naam aadmī
merā vajūd kyā hai ḳhalāoñ kī jañg huuñ

chand ḳhushiyoñ ko baham karne meñ
aadmī kitnā bikhar jaatā hai

nahīñ ye aadmī kā kaam vaa.iz
hamāre but tarāshe haiñ ḳhudā ne

har aadmī vahāñ masrūf qahqahoñ meñ thā
ye āñsuoñ kī kahānī kise sunāte ham

ye aadmī kī guzargāh-e-shāhrāh-e-hayāt
hazāroñ saal kā bār-e-garāñ uThā.e hue

khātā hai aadmī nazar ke fareb
dīda-e-dil jo vā nahīñ hotā

huuñ makāñ meñ band jaise imtihāñ meñ aadmī
saḳhtī-e-dīvār-o-dar hai jheltā jaatā huuñ maiñ

kī ḳhitābat ko gar ḳhudā samjhā
banda bhī āḳhir aadmī hī to hai

fitrat meñ aadmī kī hai mub.ham sā ek ḳhauf
us ḳhauf kā kisī ne ḳhudā naam rakh diyā

har nafas maḳhzan-e-alam hai 'ra.īs'
shukr hai umr-e-ādmī kam hai

shā.erī māñge hai puurā aadmī
ab use bhī moñchh vaalā chāhiye

ye zamīñ jis ḳhatā kī banī thī sazā
maiñ vahī to huuñ ḳhāna-ḳharāb aadmī

maut de bhī ga.ī hai javāb-e-azal
aur khaḌā rah gayā lā-javāb aadmī