Tags-Aansoo

aap kī āñkhoñ meñ aañsū dekh kar
aaj apne ġham kā andāza huā

abhī se aañkh meñ aañsū haiñ lab par aah dil meñ dard
ye āġhāz-e-mohabbat hai to phir anjām kyā hogā

jo baat hijr kī aatī to apne dāman se
vo aañsū poñchhtā jaatā thā aur maiñ rotā thā

ye maanā ek aañsū hai magar ai sa.ī-e-zabt-e-ġham
sar-e-mizhgāñ ye ik aañsū bhī dil kā tarjumāñ kyuuñ ho

ab un ke paas aañsū haiñ na aaheñ
jo ġham kī aag se nikle haiñ jal ke

ham sā be-māya koī kyā hogā
apnī āñkhoñ meñ to aañsū bhī nahīñ

sulgī huī hai ġham kī bhaTTī dil kyuuñ na pighal ke bane paanī
jo qatra aañsū ho ke bahā lahrā ke chalā teyorā ke girā

aañkh meñ aañsū nahīñ shabnam nahīñ kuchh ġham nahīñ
zaḳhm haiñ jin par koī marham nahīñ kuchh ġham nahīñ

gire haiñ jitne aañsū dāman-e-sahrā meñ sadiyoñ se
sulagtī ret bhī andar se shāyad tar nikal aa.e

aañsū falak kī aañkh se Tapke tamām raat
aur sub.h tak zamīn kā āñchal bhigo ga.e

ta.āqub ḳhud na kartī to mire aañsū nikalte
maiñ kyā kartī 'qamar' jaanā zarūrī ho gayā thā

kuchh ḳhushiyāñ kuchh aañsū de kar Taal gayā
jīvan kā ik aur sunahrā saal gayā

jaise dukh bhare din aate haiñ hāthoñ meñ
aise be-bas aañsū aate haiñ āñkhoñ meñ ḳhvāb nahīñ aate

yakāyak niiñd meñ aañsū nikal aa.e
vo ḳhvāboñ meñ mujhe taḌpā gayā shāyad

koī aañsū bahāne aa gayā shāyad
use merā taḌapnā bhā gayā shāyad

hazāroñ bastiyāñ aa jā.eñgī tūfān kī zad meñ
mirī āñkhoñ meñ ab aañsū nahīñ sailāb rahtā hai

ḳhaak meñ zid se milāo na mire aañsū ko
sachche motī ko munāsib nahīñ jhūTā kahnā

aañkh meñ dekh kar aañsū mujhe rashk aatā hai
itnā vīrān to āġhosh na kar denā thā

mujhe piinā paḌe āḳhir vo aañsū
jo bhar jaate zamīñ se āsmāñ tak

bahā.e jaao aañsū umr-bhar us kī mohabbat meñ
ki aise log motī ke mahal paate haiñ jannat meñ