jo ubhre vaqt ke sāñche meñ Dhal ke
vo Duube ek aalam ko badal ke
ġham-e-manzil tujhe shāyad ḳhabar ho
yahāñ pahuñche haiñ kitne kos chal ke
ab un ke paas aañsū haiñ na aaheñ
jo ġham kī aag se nikle haiñ jal ke
zamīñ kī ek hī jumbish bahut hai
zamīñ se aa maleñge ye mahal ke
hamīñ ne rāstoñ kī ḳhaak chhānī
hamīñ aa.e haiñ tere paas chal ke
in āñkhoñ ne ye an-honī bhī dekhī
nasīm-e-sub.h guzrī gul masal ke
zamāna kyuuñ tujhī par mar rahā hai
bahāne jab ki lākhoñ haiñ ajal ke
tirī guftār par aalim fidā hai
tirī bātoñ meñ tevar haiñ ġhazal ke
sahar hone ko hai 'ārif' ḳhudārā
ghaḌī bhar so raho pahlū badal ke