Tags-Aangan

udāsiyoñ ko to āñgan hī chāhiye ḳhālī
chhatoñ pe chāndnī rātoñ kā silsila rakhnā

āñgan ke sukūñ kī koī qīmat nahīñ hotī
kahte ho jise ghar use bāzār na samjho

kaT gayā peḌ to āñgan kā magar
mere sar se kabhī saaya na gayā

raat āñgan meñ chāñd utrā thā
tum mile the ki ḳhvāb dekhā thā

sañg hī sañg haiñ āñgan meñ 'ziyā'
pas-e-dīvār shajar kis kā hai

mere āñgan meñ nahīñ thī berī
phir bhī har samt se patthar aa.e

ghar ke āñgan meñ ravāñ ḳhuun thā ghar vāloñ kā
aur har khet pe sho.aloñ kī ghaTā chhā.ī thī

dil ke makāñ meñ aañkh ke āñgan meñ kuchh na thā
jab ġham na thā hayāt ke dāman meñ kuchh na thā

chāhtā hai dil kisī se raaz kī bāteñ kare
phuul aadhī raat kā āñgan meñ hai mahkā huā

āñgan hai na DevḌhī na chamelī kā vo mañDvā
shahroñ ne badal Daalā hai mafhūm makāñ kā

āvāra-mizājī ne phailā diyā āñgan ko
ākāsh kī chādar hai dhartī kā bichhaunā hai

ḳhushbū-e-gul kī tarah rañg-e-shafaq kī sūrat
dil ke āñgan meñ bikhar aur bikhar ya.anī tū

chhā ga.ī bachchoñ ke chehre pe na.ī hariyālī
aaj phir peḌoñ se āñgan meñ parinde utre

tasavvurāt ke āñgan meñ chāñd utrā hai
ravish ravish tirī chāhat se jagmagā.ūñ maiñ

maiñ phir ik ḳhat tire āñgan girānā chāhtā huuñ
mujhe phir se tirā rañg-e-burīda dekhnā hai

dhuup kisī bhī ghar jaa.e
mere āñgan meñ pīpal

shor-sharāba rahtā thā jis āñgan meñ
aaj vahāñ se bas ḳhāmoshī niklī hai

jo peḌ tum ne lagāyā thā mere āñgan meñ
vo is baras mujhe girtā dikhā.ī detā hai

galiyoñ meñ ghamsān kā ran hai ma.arka dast-ba-dast hai yaañ
jise bhī ḳhud par naaz bahut ho āñgan se bāhar aa.e

māñge ke phūloñ se kab tak rūp-sarūp kā maan baḌhegā
apne āñgan kī mahkāreñ be-ghar hoñgī tab socheñge