qismat apnī aisī kachchī niklī hai
har mahfil se bas tanhā.ī niklī hai
ḳhat us ke jab aaj jalāne baiThā to
māchis kī tiilī bhī siilī niklī hai
shor-sharāba rahtā thā jis āñgan meñ
aaj vahāñ se bas ḳhāmoshī niklī hai
bhūkā bachcha dekhā to in āñkhoñ se
aañsū kī phir ek nadī sī niklī hai
apnī sūrat kī parteñ jab kholīñ to
apnī sūrat us ke jaisī niklī hai
maiñ ne bhī dekhā hai terī rahmat ko
tūfānoñ se bach ke kashtī niklī hai
dil TuuTā to 'mīt' samajh meñ ye aayā
ishq vafā sab ek pahelī niklī hai