Tags-Dard

milī thī jis ko numū dard kī salīboñ se
vo lams bhī nahīñ baaqī mire masīhā meñ

ai tishnagī-e-dard koī ġham koī karam
muddat guzar ga.ī hai in āñkhoñ ko nam hue

tanhā.ī kī bojhal rāteñ pahle bhī to barsī thiiñ
zaḳhm nahīñ the itne qātil ġham itnā be-dard na thā

māyūsī kī barf paḌī thī lekin mausam sard na thā
aaj se pahle dil meñ yāro! itnā ThanDā dard na thā

bahut aziiz na kyuuñ ho ki dard hai terā
ye dard baḌh ke rahā iztirāb ho ke rahā

tamām husn-e-jahāñ kā javāb ho ke rahā
jo dard dil se uThā āftāb ho ke rahā

suḳhan ke harf pe rakhtā hai harf-e-jāñ kā madār
hayā ko aañkh kī durd-e-subū samajhtā hai

ye karb-o-dard hī dar-asl hai darkār jiine meñ
so in ko chāhiye din-rāt palkoñ pe sajā rakhnā

dard ko ḳhauf bikhar jaane kā
aañkh ko shauq ki baḌh kar dekhe

dard se māmūr hotī jā rahī hai kā.enāt
ik dil-e-insāñ magar dard-āshnā hotā nahīñ

koī karvaT badal ai dard-e-hastī
tamannā daam hotī jā rahī hai

ham apne saath dil-e-dard-mañd rakhte haiñ
koī ho bazm use sar-buland rakhte haiñ

nazar aa.e kyā mujh se faanī kī sūrat
ki pinhāñ huuñ dard-e-nihānī kī sūrat

dhaḌke pal chhan sajan salone bin
dil hai be-dard bāñvarā kaisā

fasāna-e-dard-e-ishq unvāñ badal badal kar sunā rahā huuñ
jigar jigar meñ utar rahā huuñ nazar nazar meñ samā rahā huuñ

be-qarārī ke maze lūTeñge
aaj phir dard kī shiddat hogī

libās-e-dard bhī ham ne utārā
ye kapḌe ab purāne ho chuke haiñ

raat bhar mere nāla-e-pur-dard
niiñd un kī harām karte haiñ

maiñ huuñ maiñ
vo jis kī āñkhoñ meñ jiite jāgte dard haiñ

roz-e-azal paḌī thī hazāroñ hī nemateñ
ham ne kisī kā dard-e-mohabbat uThā liyā