Tags-Zulf

sarzamīñ zulf kī jāgīr meñ thī is dil kī
varna ik daam kā phir is meñ Thikānā kyā thā

zulf ke kūchoñ kī darāzī na pūchh
chalne ko vaañ umr-e-abad chāhiye

zulf kā haal tak kabhī na sunā
kyuuñ pareshāñ mirā dimāġh huā

aalam un abruoñ kī kajī kā jo hai so hai
bal khā rahī hai zulf-e-shikan-dar-shikan hanūz

ye bhī kuchh andher hai ab zulf tere darmiyāñ
ghar base shāne kā aur hoñ dil ke kāshāne ḳharāb

koī zulf aḌe to bikhar jaanā koī lab dahkeñ to ThiThur jaanā
kyā tazkiyā karte ho dil kā ye ā.īna saaf nahīñ hotā

sūraj-dimāġh log bhī ablāġh-e-fikr meñ
zulf-e-shab-e-firāq ke pechāk ho ga.e

fazā meñ zulf ke jaadū agar bikhar jaate
havā ke saath bahut log dar-ba-dar jaate

dil zulf-e-rasā talak to pahuñchā
itnī baḳhtoñ ne rahbarī kī

bikte haiñ tere naam se ham ai kamand-e-zulf
tujh ko bhī chhoḌ dījiye to kis ke kahā.iye

sab hamāre liye zanjīr liye phirte haiñ
ham sar-e-zulf-e-girah-gīr liye phirte haiñ

vo la.al o lab ke tazkire, vo zulf o ruḳh ke zamzame
vo kārobār-e-ārzū vo valvale, vo hamhame

uqda na ye khulā ki mire dil sā pahlavān
tujh zulf ke bañdhā huā ik taar saath hai

chāhā thā mafar dil ne magar zulf-e-girah-gīr
pechāk banātī rahī pechāk se bāhar

magar laboñ pe naġhma-e-hayāt shād-kām hai
rahīn-e-āriz-e-hasīñ asīr-e-zulf-e-mushkbū!

ik pech-o-ḳham meñ gabr-o-musalmāñ haiñ mubtalā
vus.at balā kī yaar kī zulf-e-rasā meñ hai

kahtā hai koī jiim koī laam zulf ko
kahtā huuñ maiñ 'zafar' ki musattah hai kāf-e-zulf

shāne kī har zabāñ se sune koī lāf-e-zulf
chīre hai siina raat ko ye mū-shigāf-e-zulf

aapas meñ aaj dast-o-garebāñ hai roz o shab
ai mehr-vash zarī kā nahīñ mū-e-bāf-e-zulf

nāf-e-ġhazāl-e-chīñ hai ki hai nāfa-e-tatār
kyūñkar kahūñ ki hai girah-e-zulf nāf-e-zulf