Tags-Zindagi

ravāñ rahe safar-e-marg par yūñhī varna
hamārī raah meñ ye zindagī bahut aa.ī

zindagī ḳhāk-basar shola-ba-jāñ aaj bhī hai
tujh ko kho kar tujhe paane kā gumāñ aaj bhī hai

ye ik kamī ki jo ab zindagī sī lagtī hai
hamārī dhuup meñ vo sā.ebān bhī paḌtā

har ek roz isī zindagī kī tayyārī
so chāhte haiñ kabhī imtihān bhī paḌtā

maiñ nañg-e-ishq samajhtā huuñ zindagī ke liye
vo dil jo gardish-e-daurāñ kā sāmnā na kare

zindagī DhūñDh le tū bhī kisī dīvāne ko
us ke gesū to mire pyaar ne suljhā.e haiñ

zindagī aise guzārī ki subuk sar na hue
yaanī is daur meñ jiine kā hunar ho ga.e ham

tere baġhair bhī to ġhanīmat hai zindagī
ḳhud ko gañvā ke kaun tirī justujū kare

zindagī gulshan meñ bhī dushvār hai tere baġhair
is chaman kā phuul bhī ik ḳhaar hai tere baġhair

zindagānī ishq kī nākāmiyoñ meñ sarf kī
zindagī kā lutf bhī dushvār hai tere baġhair

zindagī kī be-sabātī kā koī ronā nahīñ
haa.e vo hālāt jab be-maut mar jaate haiñ log

vahī zindagī jo bahr nafas jo bahr qadam mire saath thī
kabhī merā saath bhī chhoḌ kar mirī manzileñ bhī badal ga.ī

kuchh aisā rañg mirī zindagī ne pakḌā thā
ki ibtidā hī se tarkīb thī fasāne kī

guzāre tum ne kaise roz-o-shab ham se ḳhafā ho kar
na ham ko raas aa.ī zindagī tum se judā ho kar

zindagī mat qarīb kar us ke
moḌ par hī khaḌī judā.ī hai

zindagī DhūñDh le tū bhī kisī dīvāne ko
us ke gesū to mire pyaar ne suljhā.e haiñ

akelā laḌ rahā huuñ zindagī kī jañg bachpan se
balā kī bhiiḌ hai koī nahīñ apnā nazar aayā

gharoñ meñ qaid ho kar rah ga.ī hai zindagī sab kī
zamāne kī fazā meñ dost kaisā ye asar aayā

kaTegī kis ummīd par zindagī
agar terā ġham bhī judā ho gayā

'rishī' zindagī zindagī ban ga.ī
dil apnā alam-āshnā ho gayā