Tags-Wajood

tujh se gilā nahīñ hai ki tū phir bhī ġhair thā
merā vajūd mujh se gurezāñ hai in dinoñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

tum dard kī lazzat kyā jaano kab tum ne chakhe haiñ zahr-e-subū
ham apne vajūd ke shāhid haiñ sañgsār hue shamshīr hue

andhe adam vajūd ke girdāb se nikal
ye zindagī bhī ḳhvāb hai tū ḳhvāb se nikal

duniyā bhar meñ ek haqīqat sachchā ek vajūd 'rashīd'
varna saare jañgal parbat sahrā aur samundar jhuuT

chehroñ ko qaid se hue āzād gar kabhī
bikhre hue vajūd ko kaise bachā.iye

mire vajūd ko chhū le mujhe mukammal kar
tire baġhair adhūrā hai bāñkpan merā

vajūd-e-zindagī ik khel hai do-chār lamhoñ kā
haqīqat aadmī se us kī pahchānī nahīñ jaatī

luuT kar le gayā mujh se vo mirā apnā vajūd
ab to apnā sā lage raah kā rahzan rahzan

thā muḳhtasar vajūd jasīm-o-jarī na thī
kirnoñ se āftāb kī shabnam Darī na thī

nīstī jalva-gar hai hastī meñ
kuchh adam kā mire vajūd nahīñ

phir chhūTne se pahle hī apne vajūd ko
maujūd bachpanoñ meñ giraftār dekh le

kun to merā vajūd hai huuñ
lafz utreñ ḳhitāb bhī de

kis dast-e-nāz meñ 'zafar' ā.īna-e-vajūd thā
bikhrā huuñ kā.enāt meñ har samt fard fard sā

dil kā vajūd ġham ke andhere meñ kho gayā
jaise kisī mazār kā katba miTā huā

jaan kis kis ko sambhāle ki sab ajzā-e-vajūd
haiñ pareshāni-e-ḳhātir se pareshāñ ke qarīb

jo intishār-e-vajūd-e-ziyāñ hī thā maqsūm
charāġh-e-nūr kī sūrat bikhar hī jaanā thā

maiñ sauñp duuñ use in.aam meñ bachī sāñseñ
mire vajūd ke malbe se jo nikāle mujhe

sulagtī aag ke jañgal kā ik shajar huuñ maiñ
mirā vajūd yaqīnan sarāb honā hai