Tags-Teer

aa sulh nahīñ salām to le
ye tiir chaḌhī kamān rakh de

aañkh milte hī us sitamgar se
tiir siine ke paar hotā hai

dil jo ummīd-vār hotā hai
tīr-e-ġham kā shikār hotā hai

maiñ bachā tīr-e-havādis se nishāna ban kar
aaḌe aa.ī mirī taslīm-e-sipar kī sūrat

muaaf karne kī aadat nahīñ hai vaise to
agar ye tiir tirā hai to koī baat nahīñ

kisī ke tiir lage siine meñ ḳhudā na kare
hamāre dil meñ hai kyā dard koī kyā jaane

pahle us ne barsā.e ākāsh pe saare tiir
phir dhīre se ghoḌe ko pātāl pe chhoḌ diyā

kamān chhoḌ ga.e be-nazīr jitne the
lage haiñ Thiik nishāne pe tiir jitne the

ġhazloñ meñ rañgīnī laane kī bābat phir sochūñgā
pahle ye batlā do us ne chhup kar tiir chalā.e to

muddat se koī tiir na ḳhanjar na sañg-o-ḳhisht
dushman ho merā zinda salāmat ḳhudā kare

chashm o abrū kī ye sāzish jigar o dil ko naved
ek kā tiir chale ek kī talvār chale

nāvak mujhe raqīb ko barchhī lagā.iye
tiir us taraf chale to sināñ aur kī taraf

dabā.e hoñT dāñtoñ meñ lage haiñ chashm-o-mizhgāñ se
nazar ke tiir barsāne sitāro tum to so jaao

kin dushmanoñ kā tiir banāyā gayā huuñ maiñ
apne hī jism-o-jāñ meñ utārā gayā huuñ maiñ

merī qismat se zabān-e-tīr bhī goyā nahīñ
varna kyā kyā zaḳhm-e-dāman-dār hañste bolte

lahū meñ tair ga.ī vo ghaḌī judā.ī kī
ki jis ke zahr ne jiinā mirā muhāl kiyā

laḌ ga.ī un se nazar khiñch ga.e abrū un ke
ma.arke ishq ke ab tīr-o-kamāñ tak pahuñche

raast hote haiñ kisī se bhī kabhū kaj-tīnat
tiir bantī hai kahīñ shāḳh-e-kamāñ sunte ho

kamand-e-zulf-e-rasā se baare bache to mizhgāñ ne tiir maare
ġhazab hai pesh-e-nazar tumhāre jo koī aayā shikār aayā

chale jo āshiq pe tīr-o-ḳhanzar huā vo sarsabz surḳh ho kar
chaḌhā sar us kā agar sināñ par nihāl-e-ulfat meñ yaar aayā