Tags-Sharab

ba.ad-azīñ mohtasib qasam le le
tauba kartā huuñ lā shitāb sharāb

us kī baḳhshish hai be-hisāb agar
ham bhī piite haiñ be-hisāb sharāb

bahr-e-har-zarf-e-imtihāñ sāġhar
har tamannā kā intiḳhāb sharāb

mus.haf-o-ḳhirqa bechte haiñ ham
ho ga.ī jaan ko azaab sharāb

kyuuñ ki mutlaq harām hī kahiye
pīji.egā milā ke aab sharāb

mohtasib us kā ḳhuun hai kis par
jo hai piitā bajā.e aab sharāb

us se ham jā bhiḌe adū ke ghar
hai paḌī ḳhānumāñ-ḳharāb sharāb

saḳht mātam hai ai shabāb tirā
ki rulātī hai ḳhūn-e-nāb sharāb

ai 'qalaq' mai-kade meñ sajde kyuuñ
kaun degā pa-e-savāb sharāb

saaqī na hove paas tū kab jur.a-e-sharāb
shīshe ke le gulū se qadah aur qadah se ham

paate haiñ mai-kade meñ 'baqā' ne.amat-e-sharāb
ḳhum se sab subū subū se qadah aur qadah se ham

ham intizār kareñ ham ko itnī taab nahīñ
pilā do tum hameñ paanī agar sharāb nahīñ

bahut pīr-e-muġhāñ zī-hausla hai
sharāb-e-nāb ke sāġhar luTe haiñ

haiñ ahl-e-nazar yahāñ pe sabhī ġhalat koī kaam ho na sake
sharāb-e-kuhan vo pī ke chale jo mast-e-ḳhirām ho na sake

sharāb-ḳhāne meñ ye shor kyuuñ machāyā hai
ḳhamosh 'aḳhtar'-e-ḳhāna-ḳharāb piine de

jo ruuh ho chukī ik baar dāġh-dār mirī
to aur hone de lekin sharāb piine de

kisī hasīna ke bosoñ ke qābil ab na rahe
to in laboñ se hamesha sharāb piine de

phir aisā vaqt kahāñ ham kahāñ sharāb kahāñ
tilism-e-dahr hai naqsh-e-bar-āb piine de

na chheḌ zāhid-e-nādāñ sharāb piine de
sharāb piine de ḳhāna-ḳharāb piine de

mai pī jo chāhe ātish-e-dozaḳh se tū najāt
jaltā nahīñ vo uzv jo tar ho sharāb meñ