Tags-Saqi

saaqī ga.ī bahār rahī dil meñ ye havas
tū minnatoñ se jaam de aur maiñ kahūñ ki bas

saaqī ke kaif-e-bāda-e-pārīna kī qasam
science ke jadīd ḳhazāne meñ kuchh nahīñ

ḳhudā ke vāste muñh se lagā de ḳhum ke ḳhum saaqī
baḌā ghanghor bādal jānib-e-mai-ḳhāna aatā hai

saaqī hai na mai hai na daf-o-chañg hai holī
kyā haal hai imsāl ye kyā rañg hai holī

chashm-e-sāqī se girā jaatā hai zarf-e-mai-kashāñ
toḌ deñ sāġhar jinheñ ehsās-e-besh-o-kam huā

aap hī baada huuñ maiñ aap hī saaqī 'maḳhmūr'
sāġhar āñkhoñ meñ mirī aur hai miinā dil meñ

chalā hai mahfil se apne saaqī dikhā.ūñ maiñ apnī ashk-bārī
karūñ bat-e-mai ko murġh-e-ābī abhī se dariyā bahā bahā kar

ba-rañg-e-sāġhar milā diyā muñh jo muñh se tere ḳhafā na honā
kiyā hai behosh tū ne saaqī sharāb mujh ko pilā pilā kar

duā lab-e-jām ne bhī māñgī subū ne bhī haath uThā uThā kar
hamārī mahfil meñ aayā saaqī ḳhudā ḳhudā kar ḳhudā ḳhudā kar

bahkī bahkī hoñ us kī bāteñ
saaqī saaqī pukārtā ho

fazā maġhmūm hai saaqī uThā chalkā.eñ paimāna
añdherā baḌh chalā hai lā zarā qindīl-e-mai-ḳhāna

ahl-e-mahfil dekhte hī 'saif' be-ḳhud ho ga.e
har adā saaqī kī sharh-e-jām ho kar rah ga.ī

jalva-e-ruḳhsār-e-sāqī sāġhar-o-mīnā meñ hai
chāñd uupar hai magar Duubā huā dariyā meñ hai

vā.izo vohī karūñgā maiñ jo fatvā degā
qibla-o-kāba o murshid mirā haadī saaqī

jo piyegā na sharāb aaj vo mujrim hogā
kū-ba-kū kal se tū kar de ye munādī saaqī

jām-e-jam chāhiye rindoñ ko na shāhī saaqī
saltanat hai tire kūche kī gadā.ī saaqī

sub.h se shaam talak haath se chhuTtā nahīñ jaam
chāhiye apnā taḳhallus kare jaamī saaqī

fasl-e-gul aa chukī kyā duur se dahkātā hai
mai-e-gul-rañg se bhar bhar ke gulābī saaqī

aur to hasrateñ sab 'rind' ke dil se niklīñ
jām-e-kausar kī tamannā rahī baaqī saaqī

tañg ho kar tire har baar ke dahkāne se
kos baiThe na koī riñd-e-sharābī saaqī