Tags-Ritual

dikhā dikhā ke ma.āl-e-junūñ kī fitnagarī
bashar ko rasm-e-muravvat sikhā.ī jaatī hai

maiñ tark-e-rah-o-rasm-e-junūñ kar hī chukā thā
kyuuñ aa ga.ī aise meñ tirī laġhzish-e-pā yaad

mizāj-e-ishq ne ādāb-e-husn apnā.e
dayār-e-ishq meñ vo rasm-e-bandagī na rahī

maiñ bhī ba-pās-e-dostāñ apne ḳhilāf ho gayā
ab yahī rasm-e-dostī mujh ko bhī raas aa ga.ī

ishq kartā hai hosh ko barbād
aql kī rasm-o-rāh par mat phuul

mai-ḳhānoñ kī raunaq haiñ kabhī ḳhānqahoñ kī
apnā lī havas vāloñ ne jo rasm chalī hai

jo safar bhī thā zindagānī kā
yūñhī be-rasm-o-rāh ham ne kiyā

ye sab ishāre mire kaam kyuuñ nahīñ aate
yaqīñ kī maañg ko rasm-e-gumāñ se bhartā huuñ

jo ġham mile gale se lagāne kī aarzū
rasm-o-rah-e-hayāt nibhāne kī aarzū

jafā kī rasm-e-sitam kā rivāj badlegā
faqīh-e-shahr kā āḳhir mizāj badlegā

ta.alluqāt kā rakhnā bhī toḌnā bhī muhāl
azāb-e-jāñ hai ye rasm-e-vafā bhī mere liye

vahī safar hai vahī rasm-e-āblā-pā.ī
yaqīn-e-rāh mirā kāmyāb ho ke rahā

unheñ ḳhauf rasm-o-rivāj kā hameñ vaz.a apnī aziiz hai
vo rivāyatoñ kī panāh meñ ham anā ke zer-e-itāb haiñ

zinda ho rasm-e-junūñ kis kī navā-rezī se
ab rahā kaun yahāñ sho.ala-ba-jāñ ham-nafaso

rasm-e-duniyā ke salāsil meñ giraftārī hai
mat Thaharnā ki kahīñ phāñs javāñ-tar ho jaa.e

har baar hī maiñ jaan se jaane meñ rah gayā
maiñ rasm-e-zindagī jo nibhāne meñ rah gayā

maiñ bhī kab se chup baiThā huuñ vo bhī kab se chup baiThī hai
ye hai visāl kī rasm anokhī ye milne kī riit na.ī hai

kyuuñ na hue māh-e-nau misāl-e-azīz
jis mane rasm-e-kam-numā.ī hai

ulTī har ek rasm-e-jahāñ-e-shu.ūr hai
sīdhī sī ik ġhazal mujhe likhnī zarūr hai

ye kaun sā maqām-e-rah-o-rasm hai ki vo
itne hue qarīb ki bezār ho ga.e