Tags-Raushni

kamre meñ phailtī hī ga.ī raushnī kī lahr
kirnoñ kā jaal thā ki kahīñ TūTtā na thā

raushnī kī agar alāmat hai
raakh uḌtī hai kyuuñ sharāre par

mile haiñ harf bas itne mujhe bayāñ ke liye
galī kī raushnī jaise kisī makāñ ke liye

be-falak zamīnoñ par raushnī ko tarsoge
soch ke darīchoñ meñ koī kahkashāñ rakhnā

phir bhī mirī nigāh meñ donoñ jahāñ siyāh the
merī shab-e-firāq ko chāñd ne raushnī bhī dī

mere bistar pe aa ke leT ga.ī
raushnī kī lakīr sī āvāz

jab tumhārā ḳhayāl aatā hai
Duub jaate haiñ raushnī meñ ham

raat hotī to koī baat na thī
luT ga.e din kī raushnī meñ ham

kaT ga.ī raat mirī sa.ī-e-musalsal ke tufail
raushnī sub.h-e-daraḳhshāñ kī ḳhabar laa.ī hai

raushnī ruuh talak aa pahuñchī
ab andhere meñ dikhā.ī degā

apne dam kī hai raushnī saarī
dīda-e-dil to vā kare koī

vahāñ havāoñ ke ruḳh bhī nigāh meñ rakhnā
jahāñ charāġh jalāte ho raushnī ke liye

kamāl jab hai ki us raah meñ charāġh jalāo
jo muddatoñ se tarastī hai raushnī ke liye

ye jugnuoñ kī chamak raushnī nazar bhar kī
havā meñ uḌte musāfir kahāñ Thaharte haiñ

merī sāñsoñ meñ soyā huā āsmāñ jaag uThā
ḳhuuñ kī raftār ko chiir kar gir paḌī raushnī zindagī!

us añdhere kā shukriya jis meñ
ham jo Duube to raushnī bhī milī

kabhī dil sochtā hai in tavā.if-zādiyoñ kī zindagī likkhūñ
ki jin ke roz-o-shab koThe kī chhoTī koTharī meñ malgajī sī raushnī meñ zindagī kī talḳhiyāñ chun kar guzartī

chāñd kā dukh bāñTne nikle haiñ ab ahl-e-vafā
raushnī kā saarā shīrāza bikhar jaane ke ba.ad

allāh allāh tire husn kī ik jhalak raushnī ho ga.ī az-zamīñ-tā-falak
ek bijlī sī lahrā.ī kuchh duur tak phir Thahar kar mire rū-ba-rū rah ga.ī

rātoñ se chhīn kar vo charāġhoñ kī raushnī
jab sub.h ho ga.ī to use raat kar ga.ī