Tags-Raat

rotā phiregā raat ke rastoñ pe māhtāb
āġhosh-e-arz-ḳhāk to sūraj se bhar ga.ī

zarā tujhe bhī to ehsās-e-hijr ho jānāñ
bas ek raat mere haal meñ guzār ke dekh

ye raat din kī udāsī ye be-hisī ye thakan
hayāt hai ki tah-e-barf nā-damīda chaman

din-bhar dukh ke patthar kaaTe
raat milī na rāhat kī

ye maiñ jo raat din nahīñ apne havās meñ
vo baaġh hai zarūr kahīñ par khilā huā

tadbīr tark-e-dushman-e-jāñ kī hai raat din
kis tarah phir mujhe gila-e-dostāñ na ho

phir vahī raat mujh meñ Thahrī hai
phir samā.at meñ shor sā hai bahut

hijr kī raat to karvaT meñ guzar jaatī hai
aur din bhī bahut āsān huā jaatā hai

baar tujh hijr kā bhārī hai ḳhudā ḳhair kare
rāt-din nāla-o-zārī hai ḳhudā ḳhair kare

kab mire chāñd ke aane señ ujālā hogā
hijr kī raat añdhārī hai ḳhudā ḳhair kare

'ramz' terī tīra-baḳhtī kī ye shab kaT jā.egī
raat ke dāman meñ koī chiiz nūrānī bhī hai

ik sajda dil ke māthe par
har pichhlī raat machaltā hai

sunā hai raat farishte chhupe the ma.abad meñ
hamāre shahar meñ phir aaj qatl-e-ām huā

koī hañgāma-e-hayāt nahīñ
raat ḳhāmosh hai sahar ḳhāmosh

vo burā kahe mujhe rāt-din ye razā hai us ke mizāj kī
use 'āfī' maiñ bhī burā kahūñ kahāñ mujh meñ itnī majāl hai

kyuuñ yahāñ sub.h-e-nau kī baat chale
kyuuñ sitam kī siyāh raat Dhale

kaḌā hai din baḌī hai raat jab se tum nahīñ aa.e
digar-gūñ haiñ mire hālāt jab se tum nahīñ aa.e

jab pyaar se miltā hai to bhartā hai kahāñ dil
ulfat se bharī raat zarā aur zarā aur

is ko na raat kah tū na is ko batā ġhalat
kyā jaane kyā sahī hai vaaq.e meñ kyā ġhalat