Tags-Musafir

paañv ā.inda kī jānib sar guzishta kī taraf
yuuñ bhī chalte the musāfir ik safar aisā bhī thā

faza-e-āsmānī rah-guzar hai
musāfir raat kā garm-e-safar hai

āvāra haiñ is aañkh se us aañkh talak ḳhvāb
jaise ki musāfir kā koī ghar nahīñ hotā

rāste meñ kisī manzil pe bhī ārām na luuñ
vo musāfir huuñ ki rukne kā kahīñ naam na luuñ

ret hī ret hai is dil meñ musāfir mere
aur ye sahrā tirā naqsh-e-kaf-e-pā chāhtā hai

musāfir apnī manzil par pahuñch kar chain paate haiñ
vo maujeñ sar paTaktī haiñ jinheñ sāhil nahīñ miltā

ḳhaak pahuñchegā vo sar-e-manzil
jo musāfir huā takān se ḳhush

kyā baiThā hai raah meñ musāfir
chalnā hī yahāñ se pesh-pā hai

safar hai shart musāfir-navāz bahutere
hazār-hā shajar-e-sāya-dār raah meñ hai

sar-e-sahrā musāfir ko sitāra yaad rahtā hai
maiñ chaltā huuñ mujhe chehra tumhārā yaad rahtā hai

sarā.e-jāñ meñ dānista musāfir luT gayā varna
ki dil sā saḳht-jāñ ik gul-badan ko vaar kyā detā

sabhī musāfir chaleñ agar ek ruḳh to kyā hai mazā safar kā
tum apne imkāñ talāsh kar lo mujhe parinde pukārte haiñ

pattiyāñ TuuT ke patthar kī tarah lagtī haiñ
un daraḳhtoñ ke tale kaun musāfir Thahre

ghar basā kar bhī musāfir ke musāfir Thahre
log darvāzoñ se nikle ki muhājir Thahre

tishnagī kab ke gunāhoñ kī sazā hai 'qaisar'
vo kuaañ suukh gayā jis pe musāfir Thahre

shāḳh-e-gul chhoḌ ke dīvār pe aa baiThe haiñ
vo parinde jo andheroñ ke musāfir Thahre

ham-safar chāhiye hujūm nahīñ
ik musāfir bhī qāfila hai mujhe

musāfir ho ke aa.e haiñ jahāñ meñ tis pe vahshat hai
qayāmat thī agar ham is ḳharāba meñ vatan karte

maiñ ne har gaam use avval o āḳhir jaanā
lekin us ne mujhe lamhoñ kā musāfir jaanā

jaane kab vo ek musāfir aa pahuñche
chaukhaT par ik diip jalā kar jalne do