Tags-Lucknow

aa.e na mere paas to maiñ aap hī chalūñ
mujh ko ḳhudā kare kahīñ bulvā.e lucknow

hūr-o-parī ko rashk thā ik ek shaḳhs par
be-misl the sabhī mah-e-sīmā-e-lucknow

kyā kyā hasīñ the jam.a paristāñ kā taḳhta thā
nazroñ meñ phirte haiñ ruḳh-e-zebā-e-lucknow

aisā huā huuñ hijr meñ us ke nahīf-o-zār
dekhe agar mujhe vahīñ sharmā.e lucknow

gulshan ajab bahār ke har qasr rashk-e-ḳhuld
aur gomtī ġhazab kī hai dariyā-e-lucknow

haTtā nahīñ tasavvur-e-asbāb-o-mulk-o-māl
kānoñ meñ baj rahī hai vo shahnā-e-lucknow

allāh ai buto hameñ dikhlā.e lucknow
sote meñ bhī ye kahte haiñ ham haa.e lucknow

ḳhush-chashmī āhuoñ kī vo bhūle jahān meñ
dekhe jo aañkh nargis-e-shahlā-e-lucknow

maiñ kyā kahūñ faqīroñ ko jo kuchh ġhurūr thā
ik ik gadā-e-shahr thā dārā-e-lucknow

arz-e-dakan meñ jaan to dillī meñ dil banī
aur shahr-e-lucknow meñ hinā ban ga.ī ġhazal

hai 'rashīd' ab tak giyāh-e-lucknow mardum giyāh
kyā zamīñ hai jo ujaḌ jaane pe mardum-ḳhez hai

ham haiñ rusvā-kun-e-dillī-o-lucknow apnī kyā zindagī apnī kyā aabrū
'mīr' dillī se nikalne ga.e lucknow tum kahāñ jāoge ham kahāñ jā.eñge

taqdīr meñ thī furqat-e-yārān-e-lucknow
is shahr meñ 'munīr' kahāñ thā kahāñ basant

tire ḳhayāl tirī aarzū se duur rahe
navāb ho ke bhī ham lucknow se duur rahe

har samt ik hujūm-e-nigārān-e-lucknow
aur maiñ ki ek shoḳh-ġhazal-ḳhvān-e-lucknow

sabr-āzmā hai ġhamza-e-turkān-e-lucknow
rashk-e-zanān-e-misr kanīzān-e-lucknow

dast-e-junūñ ko rokiye ye ḳhabt chhoḌiye
rusvā hai yūñhī chāk-e-garebān-e-lucknow

ab us ke ba.ad sub.h hai aur sub.h-e-nau 'majāz'
ham par hai ḳhatm shām-e-ġharībān-e-lucknow

firdaus-e-husn-o-ishq hai dāmān-e-lucknow
āñkhoñ meñ bas rahe haiñ ġhazālān-e-lucknow

ik nau-bahār-e-nāz ko taake hai phir nigāh
vo nau-bahār-e-nāz ki hai jān-e-lucknow