Tags-Hawa

sag-e-zamāna se aage nikal gayā huuñ maiñ
ab apne sāmne tanhā khaḌā huā huuñ maiñ

idhar se ho ke koī mehrbāñ havā guzre
dayār-e-habs meñ sadiyoñ se ghuT rahā huuñ maiñ

khaḌā huā huuñ harīfoñ meñ sar jhukā.e hue
ki apne aap se ab ke bahut judā huuñ maiñ

ḳhud apne haath se kyā kyā huā nahīñ mire saath
maiñ kyā kahūñ mirā kuchh bhī gila nahīñ mire saath

ḳhudā kī raah meñ niklā huuñ maiñ tan-e-tanhā
ye pahlī baar huā hai ḳhudā nahīñ mire saath

kis kī ḳhātir ujaaḌ raste par
phuul le kar shajar khaḌā huā thā

kisī se kyā kaheñ suneñ agar ġhubār ho ga.e
hamīñ havā kī zad meñ the hamīñ shikār ho ga.e

yahāñ jo dil meñ daaġh thā vahī to ik charāġh thā
vo raat aisā gul huā ki sharmsār ho ga.e

lutf aatā hai hameñ zulm se Takkar le kar
hashr barpā na huā haa.e qayāmat na milī

kuchh is tarah se vo shāmil huā kahānī meñ
ki is ke baad jo kirdār thā fasāna huā

tabdīliyoñ kā nashsha mujh par chaḌhā huā hai
kapḌe badal rahā huuñ chehra badal rahā huuñ

kyā huā aaj terī mahfil meñ
ham ko aa.e salām patthar ke

havā ke dosh pe ik surma.ī lakīr ke saath
mirī talāsh meñ shāyad mirī sadā bhī hai

raat bhar āvāra patte aur havā
raqs karte haiñ shajar ke ās-pās

sulagtī ret pe āñkheñ bhī zer-e-pā rakhnā
nahīñ hai sahl havā se muqābla rakhnā

sulagtā huā din jo kaT bhī gayā
to phir aañch detī huī raat hai

havā se rishta-e-jāñ kyā nibhā.ūñ
kisī kī yaad hī jab bad-gumāñ hai

qadr to hamesha
parda-dārī kī hī huā kartī hai

ḳhud us se kahā ghar aane ko aur us ke binā mar jaane ko
aur ab jo vo kuchh āvāra huā jī rah rah kar ghabrātā hai

haiñ qarya qarya dhuup meñ jhulas ga.e to kyā huā
sa.ūbatoñ ko ziist kī harā ke dekhte haiñ ham