Tags-Hawa

vo jo barf abhī thī jamī huī kisī maslahat ke hisār meñ
zarā vaqt kī jo havā lagī to vo ek pal meñ pighal ga.ī

zabān-e-ḳhalq pe aayā to ik fasāna huā
vo lafz saut o sadā se jo āshnā na huā

balā-e-jāñ bhī hai jāñ-baḳhsh bhī hai ishq-e-butāñ
ajal ko uzr milā ziist ko bahāna huā

tirī nigāh kiran thī to merā dil shabnam
tirī nigah se bhī dil kā mo.āmla na huā

ba-sad-ḳhulūs rahā saath zindagī bhar kā
muqābla bhī zamāne se dostāna huā

sunā hai bazm meñ terī hai tazkira merā
tirī vafā kā ta.āruf bhī ġhā.ebāna huā

ham aise kho ga.e āġhāz meñ ḳhabar hī nahīñ
ki bazm uTh ga.ī kab ḳhatm kab fasāna huā

har ek lamha kiyā qarz zindagī kā adā
kuchh apnā haq bhī thā ham par vahī adā na huā

tere hoñToñ kī ḳhafī sī larzish
ik hasīñ sher huā ho jaise

na jiite jī huā hargiz vafā nā-āshnā merā
par us kī dāstāñ ban kar rahā zikr-e-vafā merā

ḳhudā ke shahr meñ phir koī sañgsār huā
jise bhī dekhiye patthar dikhā.ī detā hai

uTh ga.ī jis taraf nazar hashr sā ik bapā huā
un kī nigāh-e-nāz hai fitna-e-rozgār kyā

miT ke bhī us kī justujū hai jo jahāñ meñ chār-sū
legā kisī jagah qarār uḌtā huā ġhubār kyā

bād-e-ḳhizāñ kī mauj thī ġhuncha-e-dil ke haq meñ sam
mausam-e-gul kī bhī havā hogī na sāzgār kyā

muvāfaqat meñ chalī thī mire safīne kī
havā ne biich samundar meñ iḳhtilāf kiyā

mai se vo jām-e-jism hai jab se bharā huā
sar hai futūr-e-ḳhvāhish-e-shab se bharā huā

dil hai ki jāntā hai junūñ kā ma.aal bhī
sar hai ki phir bhī shor-o-shaġhab se bharā huā

ġhaflat-shi.ār dil pe koī raat Daal kar
jaatā hai mehr ġhaiz-o-ġhazab se bharā huā

dīvār-e-mai-kadā koī raste meñ aa ga.ī
varna ye jaam hai koī ab se bharā huā

haTtā nahīñ nigāh-e-alamnāk se kabhī
chehra koī ḳhumār-e-tarab se bharā huā