Tags-Hawa

vahshat karne se bhī dil bezār huā hai
dasht o samundar āñchal meñ simTā.e hue huuñ

maiñ talab ke dasht meñ phir chukā to ye raaz mujh pe ayaañ huā
mirī tishnagī ke ye pher haiñ ki jo aab se haiñ sarāb tak

ḳhayāl achchhā huā to sher ban kar aa.egā bāhar
bahut achchhā huā to dil ke andar baiTh jā.egā

iraq o shaam ke parde meñ be-naqāb huā
tamām dahr kā dukh ek nañge sar meñ thā

vaqt se TūTtā huā lamha
aur is meñ dhaḌak rahī huuñ maiñ

zabāñ par aah rahī lab se lab kabhū na milā
tirī talab to milī kyā huā jo tū na milā

javāb meñ jo sunā thā vo yaad kyā hotā
hameñ to apnā sunāyā huā bhī yaad nahīñ

havā kī zad pe jab aa.e to bujh ga.e 'ḳhāvar'
vo sab charāġh jo mere na the jalā.e hue

phir tirī yaad se raushan huā kāshana-e-dil
vus.at-e-kaun-o-makāñ jalva-gah-e-nāz na ho

jab havā shab ko badaltī huī pahlū aa.ī
muddatoñ apne badan se tirī ḳhushbū aa.ī

ḳhush-rañg āsmān uḌā le ga.ī havā
ḳhushbū kā sā.ebān uḌā le ga.ī havā

kāñTe ulajh ke dāman-e-hastī se rah ga.e
phūloñ kī dāstān uḌā le ga.ī havā

āñkhoñ meñ ab chamakte dar-o-bām haiñ kahāñ
ḳhvāboñ kā vo makān uḌā le ga.ī havā

dil ke ta.alluqāt kī ḳhushbū kahīñ nahīñ
marbūt ḳhāndān uḌā le ga.ī havā

be-samt zindagī mirī be-samt hī rahī
manzil kā har nishān uḌā le ga.ī havā

qismat se aa ga.e the ham ahl-e-sitam ke haath
vo tiir vo kamān uḌā le ga.ī havā

tūfāñ se kheltī huī kashtī guzar ga.ī
har chand bādbān uḌā le ga.ī havā

zāhir huā jo matl.a-e-dil par yaqīñ kā nuur
pal bhar meñ har gumān uḌā le ga.ī havā

badlā thā jin se 'nāz' mirā lahja-e-ġhazal
vo tarz vo bayān uḌā le ga.ī havā

raushnī dikhā dūñgā in andher-nagroñ meñ
ik havā ziyāon kī chār-sū chalā dūñgā