Tags-Duniya

is tarah tujhe ishq kiyā hai ki ye duniyā
ham ko hī kahīñ ishq kā hāsil na banā de

karnī nahīñ hai duniyā meñ ik dushmanī mujhe
kahte haiñ saare log kabhī aadmī mujhe

jaatī hai gar to jaa.eñ ye duniyā kī daulateñ
bas raam aa.ī hai to faqat sādgī mujhe

ye duniyā adhūrī sī lagne lagī
achānak mujhe jaane kyā ho gayā

behtar hai ham bhī chashm-e-jahāñ-bīñ ko muuñd leñ
duniyā ke ab tamām nazāre udaas haiñ

guzar rahī hai mujhe rauñdtī huī duniyā
qadīm o kohna rivāyāt meñ paḌā huā huuñ

āḳhir ab aisā bhī kyā duniyā se bad-dil honā 'zeb'
pahle miTTī meñ to mere yaar ye jauhar mile

yuuñ to in āñkhoñ se ham ne o but kahne ko duniyā dekhī
lekin saarī ḳhudā.ī bhar terī sūrat-e-yaktā dekhī

khel ga.e kyuuñ jaañ pe 'anjum' tum ne abhī kyā duniyā dekhī
marne lage ḳhūbān-e-jahāñ par terī merī dekhā-dekhī

jitne mahbūb parī-zād haiñ duniyā meñ 'nazīr'
sab ke allāh kare husn kī aur jaan kī ḳhair

jahāñ tak ranj-e-duniyā hai diye jaao
hamāre dal ke tum TukḌe kiye jaao

dildār dil se lag ke khaḌe hoñ to kis liye
duniyā kī oT se mirā dīdār karte ho

ye baḳhshish apne banda-e-nāchīz ke liye
thoḌī sī pūñjī aisī ki duniyā kaheñ jise

ik mazbah-e-jazbāt-o-afkār hai ye duniyā
ik maskan-e-ashrār-o-āzār hai ye duniyā

ye dard bharī duniyā bastī hai gunāhoñ kī
dil-chāk umīdoñ kī saffāk nigāhoñ kī

ā.ankhoñ meñ samā.ī hai ik ḳhvāb-numā duniyā
tāroñ kī tarah raushan mahtāb-numā diyā

ai ishq hameñ le chal ik nuur kī vaadī meñ
ik ḳhvāb kī duniyā meñ ik tuur kī vaadī meñ

ik aisī fazā jis tak ġham kī na rasā.ī ho
duniyā kī havā jis meñ sadiyoñ se na aa.ī ho

ik aisī bahisht aa.iiñ vaadī meñ pahuñch jaa.eñ
jis meñ kabhī duniyā ke ġham dil ko na taḌpā.eñ

maan lo merī jo hai us pe qanā.at kar lo
ab nahīñ utregā is duniyā meñ mann-o-salvā