Tags-Dil

hāl-e-dil sun ke vo āzurda haiñ shāyad un ko
is hikāyat pe shikāyat kā gumāñ guzrā hai

dil kī tanhā.iyoñ kā mudāvā nahīñ
ghuum kar ham ne dekhe haiñ mele bahut

kiyā hai daaġh ne kyoñ us ko manzil-e-ḳhurshīd
hamārā dil hai ye kuchh burj-e-āftāb nahīñ

nāzuk thā bahut kuchh dil merā ai 'shād' tahammul ho na sakā
ik Thes lagī thī yuuñ hī sī kiyā jald ye shīsha TuuT gayā

bazm-e-ahbāb meñ hāsil na huā chain mujhe
mutma.in dil hai bahut, jab se alag baiThā huuñ

dil ko ġham-e-hayāt gavārā hai in dinoñ
pahle jo dard thā vahī chārā hai in dinoñ

ye dil zarā sā dil tirī yādoñ meñ kho gayā
zarre ko āñdhiyoñ kā sahārā hai in dinoñ

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

monis-e-shab rafīq-e-tanhā.ī
dard-e-dil bhī kisī se kam to nahīñ

mujrim-e-dil ko kahāñ faisla sunñe kā dimāġh
us ne baḳhshā hai to kyā aur sazā dī hai to kyā

laa.ī kashish-e-dil hī tumheñ tum ne to varna
yahāñ aane meñ ik umr talak aar bahut kī

us chashm ne dekhā dil-e-bīmār ko mere
bīmār ne kal ḳhātir-e-bīmār bahut kī

abrū kī tasavvur meñ huā qatl mirā dil
phal kyuuñ na mile mard thā talvār bahut kī

shaitān se dil ko rabt ho jaatā hai
dushvār insāñ ko zabt ho jaatā hai

koī bhī yaqīñ dil ko 'shād' kar nahīñ saktā
ruuh meñ utar jaa.e jab gumāñ kī tanhā.ī

jo naam hathelī kī lakīroñ meñ nahīñ thā
kyuuñ aaj talak dil pe vo tahrīr hai jānāñ

kyā jāniye kis roz bikhar jaa.e kahīñ bhī
is aas kī dil meñ jo ik tanvīr hai jānāñ

dāġh-e-dil haiñ ġhairat-e-sad-lāla-zār ab ke baras
ba.ad muddat ke hai phir josh-e-bahār ab ke baras

shīshe meñ pinhāñ hai mai aur dil meñ zauq-e-mai-kashī
aate hī saaqī ke ai abr-e-bahār ab ke baras