Tags-Dil

hai dil hī vo nādāñ ki ho tadbīr se naumīd
aur phir koī tadbīr kiye bin na rahā jaa.e

phir mujh se is tarah kī na kījegā dil-lagī
ḳhair us ghaḌī to aap kā maiñ kar gayā lihāz

mirā dil bhī thā mirī jaañ bhī thī na vahī rahā na yahī rahī
mujhe kyā ḳhabar ki vo kyā huā mujhe kyā ḳhabar ki ye kyā huī

mirī umr 'muztar'-e-ḳhasta-dil kaTī ranj-o-dard-o-firāq meñ
na kisī se merī davā huī na davā se mujh ko shifā huī

sadiyoñ kā karb lamhoñ ke dil meñ basā diyā
pal bhar kī zindagī ko davāmī banā diyā

na shikva lab tak aa.egā na naala dil se niklegā
mire zabt-e-mohabbat kā bharam mushkil se niklegā

na hasrat dil se niklegī na armāñ dil se niklegā
jo is phande meñ phañs jā.egā vo mushkil se niklegā

ḳhudā rakkhe ye pās-e-vaz.a meñ tum se bhī baḌh kar hai
tumhīñ aa kar nikāloge to armāñ dil se niklegā

na khīñch ai mehrbāñ siine se mere tiir rahne de
nikal jā.egā dam merā jo paikāñ dil se niklegā

'nasīm' achchhī ġhazal par daad deñge ahl-e-dil dil se
utar jā.egā dil meñ sher jo bhī dil se niklegā

duniyā ne dil ko aur dil ne duniyā ko
donoñ ne hī apne taur pe bartā hai

ek dil rakhte the vo bhī kho chuke
ho ga.e muflis badaulat aap kī

phuul kī jā pañkhuḌī ai bāġh-e-husn
dāġh-e-dil par hai ināyat aap kī

usī charāġh se nisbat rakhūñ abhī 'sājid'
ki dil lagā.ūñ kisī aur dil-rubā ke saath

bujh rahe haiñ charāġh-e-dair-o-haram
dil jalāo ki raushnī kam hai

ye roz-e-tajdīd-e-ahd-e-ulfat ye roz paimān-e-dil-navāzī
hazār taslīm kar rahā huuñ magar yaqīn-e-vafā nahīñ hai

na jaane kis kis se dil lagā kar vafā se māyūs ho chukā huuñ
nazar pareshān-e-shash-jihat hai koī bhī dard-āshnā nahīñ hai

bajā bajā be-shumār aariz nazar nazar ko taras rahe haiñ
magar ye dil kā mo.āmla hai nigāh kā vāsta nahīñ hai

mat dard-e-dil ko pūchh ba-qaul-e-'fuġhāñ' 'bayāñ'
ik umr chāhiye mirā qissa tamām ho

raqs kartā hai ba-andāz-e-junūñ dauḌtā hai
dil agar ḳhush ho to chehre pe bhī ḳhuuñ dauḌtā hai