Tags-Dil

mirā dil dahalne lagā abhī do ghaḌī tū duur hai ham-nashīñ
ḳhabar-e-visāl nahīñ sunī ye mirī qazā kā payām hai

pise dil hazāroñ taḌap ga.e jo sisak rahe the vo mar ga.e
uThe fitne hashr bapā huā ye ajiib tarz-e-ḳhirām hai

e'tibār aa.e bhī kaise us kā
baat jo dil ko na bhaa.e apne

kah rahā thā vo ki kaise kaT rahe the us ke din
maiñ girafta-dil bahut us kī kahānī se huā

ik jagah kī saaf aur taaza havā achchhī lagī
kuchh ilāj-e-dil vahāñ ke saada paanī se huā

koī pūchhe na ham se kyā huā dil
huā kyā luT gayā dil miT gayā dil

ye kah kar de diyā mujh ko mirā dil
hameñ kosegā degā bad-duā dil

marnā de jā.egī mujh ko tirī aañkh
mazā de jā.egā tujh ko mirā dil

chaman meñ jo khilā gul maiñ ye samjhā
ki hai merā ye murjhāyā huā dil

uThegā lutf sohbat kā abhī to
na.e tum ho na.e ham haiñ nayā dil

kisī se yuuñ daġhā karte nahīñ haiñ
are o be-muravvat bevafā dil

qayāmat hai tumhārī chulbulī shakl
qayāmat hai hamārā chulbulā dil

hamārā dil hamāre kaam kā hai
kahāñ paa.eñ tumhāre kaam kā dil

bahut hai jam ko apne jaam par naaz
zarā laanā mirā TuuTā huā dil

kisī kā zor phir chaltā nahīñ hai
kisī se jab kisī kā mil gayā dil

use kis muñh se kahte ho burā tum
tumheñ kis dil se detā hai duā dil

gayā vo daaġh le kar daaġh de kar
nishānī de gayā dil le gayā dil

hasīñ us ko burā samjhe bachī jaañ
burā ban kar bahut achchhā rahā dil

kaheñ kyā kis ne luuTā kis ko luuTā
luTe ham tum luTā joban luTā dil

vahī achchhā thā us chhātī kī sil se
badal detā kisī but se ḳhudā dil