Tags-Dil

koī tāsīr to hai is kī navā meñ aisī
raushnī pahle na thī dil kī fazā meñ aisī

āshiyān-o-chaman ke dil-dāda
tū kabhī vus.at-e-qafas mat pūchh

nigāh-e-ishq dil-e-zinda kī talāsh meñ hai
shikār-e-murda sazā-vār-e-shāhbāz nahīñ

ye ilāqa bhī magar dil hī ke taabe Thahrā
ham samajhte the amaañ gosha-e-idrāk meñ hai

shahr ke ābād sannāToñ kī vahshat dekh kar
dil ko jaane kyā huā maiñ shaam se ghar aa gayā

mujrim hai dil ki ma.amūlī āhaToñ par bhī chauñk uThtā hai
kamre meñ varna koī nahīñ ye pāgal havā kā jhoñkā hai

ik vaqt thā ki dil ko sukūñ kī talāsh thī
aur ab ye aarzū hai ki dard-e-nihāñ rahe

hai dar-ba-darī qismat merī shorīda-sarī tū hī le chal
taskīn-e-dil-e-mahzūñ ke liye gulzār to kyā kohsār to kyā

haiñ azm-e-musāfir ke aage ḳhatrāt masāfat hech bahut
manzil kī talab hai dil meñ agar ho rāhguzar dushvār to kyā

kisī kī nabz pe is tarah uñgliyāñ rakh de
ki tere sāmne vo dil kī dāstāñ rakh de

ḳhū-e-ġham dil ko hai ya.anī his-e-ġham kuchh bhī nahīñ
kyā hai ab kār-gah-e-nāz-o-sitam kuchh bhī nahīñ

darḳhur-e-be-ḳhudī-e-dil na alam hai na surūr
zahr-e-ġham kuchh bhī nahīñ sāġhar-e-jam kuchh bhī nahīñ

farq-e-zarf-e-dil-o-paimāna-e-taqdīr na pūchh
us ne bharpūr diyā aur use ġham kuchh bhī nahīñ

chilchilātī huī ye dhuup ye tapte maidāñ
aur idhar hausla-e-dil kā vo isrār ki bas

shiddat-e-shauq meñ had se na guzar jaa.e kahīñ
koī kar de dil-e-nādāñ ko ḳhabar-dār ki bas

ai shaiḳh dil-e-sāf yūñhī to nahīñ miltā
ham ne asar-e-rū-e-dil-ārām liyā hai

dil ke dāġhoñ ne kiyā ham ko chaman se be-niyāz
mannateñ maanī haiñ barsoñ tab ye baaġh aayā hai haath

daaġh dil par naala lab par chashm giryāñ siina riish
'āshiq'-e-shorīda ko kis dam farāġh aayā hai haath

vo taqāzā-e-mohabbat thā to maiñ ne uf na kī
phir to zālim umr bhar dil pe sitam kartā rahā

ḳhairiyat hī pūchhne aa.egā tū ye soch kar
merā dil bīmār ḳhud ko ai sanam kartā rahā