Tags-Dil

ab dil meñ sar-e-shām charāġhāñ nahīñ hotā
sho.ala tire ġham kā kahīñ bujhne na lagā ho

vo sham.a bujh ga.ī thī to kohrām thā tamām
dil bujh ga.e to shor-e-azā kyuuñ nahīñ huā

tafraqa ho is tarah to kyā jame ishrat kā rañg
dil za.īf-o-nātavāñ lab zer-e-bār-e-naġhma hai

ye zarā sī ik jhalak ne dil o jaañ ko yuuñ jalāyā
tirī barq-e-husn se phir koī kyā do-chār hotā

dil ke muāmle meñ mujhe daḳhl kuchh nahīñ
is ke mizāj meñ jidhar aa.e udhar rahe

ham ne kahne ko tumheñ dil se bhulāyā huā hai
bas yahī daaġh hai siine meñ chhupāyā huā hai

mirā dil na thā alam-āshnā ki tirī adā pe nazar paḌī
vo na jaane kaun sā vaqt thā ki binā-e-ḳhūn-e-jigar paḌī

zaḳhm-e-dil ho ga.e ḳhandāñ vo mulāqāt huī
hai mujhe aap kā andāz-e-ayādat ma.alūm

daraḳhtoñ par banānā naqsha dil ke
inheñ goyā harā karne kī sāzish

dard kaisā bhī ho kyā hotā hai
dil to ye mar ke bhī ab zinda hai

mohabbat-āshnā dil maz.hab-o-millat ko kyā jaane
huī raushan jahāñ bhī sham.a parvāna vahīñ aayā

āñkheñ mujhe talvoñ se vo malne nahīñ dete
armān mire dil ke nikalne nahīñ dete

ḳhātir se tirī yaad ko Talne nahīñ dete
sach hai ki hamīñ dil ko sambhalne nahīñ dete

dil vo hai ki fariyād se labrez hai har vaqt
ham vo haiñ ki kuchh muñh se nikalne nahīñ dete

yuuñ to shīrāza-e-jāñ kar ke baham uThte haiñ
baiThne lagtā hai dil jūñhī qadam uThte haiñ

dil par nahīñ qaabū to zabāñ laakh ho bas meñ
nazroñ se jhalaktā hai ḳhayālāt kā aalam

kiyāñ makāñ taakā hai dil ne raat aur din se pare
be-zabāñ hote chale haiñ qaid-e-bām-o-dar meñ ham

jaane is rah-rav kī nazreñ kaun sī manzil pe hoñ
ek kāñTā sā khaTakte haiñ dil-e-rahbar meñ ham

aayā unheñ pasand to un kā hī ho gayā
kam thā hamāre dil se hamārā kalām kyā

na banāyā muñh kisī jaam par na lagāyā dil kisī jaam se
jo laboñ tak aa.e vo pī liye jo chhalak ga.e vo chhalak ga.e