Tags-Dil

dil ko rahtā hai musalsal muntashir hone kā ḳhauf
yaanī andar se mujhe TuuTe hue arsa huā

ai hujūm-e-ārzū ab chāhtā huuñ taḳhliya
ḳhāna-e-dil meñ tujhe rahte hue arsa huā

jā tū apnī raah le ab ai dil-e-ishrat-talab
pehlū-e-'shahbāz' meñ baiThe hue arsa huā

āñkheñ baras ga.iiñ to sukūñ dil ko mil gayā
bādal to sirf sūkhī zamīneñ bhigo ga.e

āñkhoñ se niiñd rūThī to nuqsān ye huā
mere hazāroñ ḳhvāb mire dil meñ so ga.e

tujhe ai shola-rū kab chhoḌtā huuñ
jale dil ke phaphūle phoḌtā huuñ

ye soch ke dil phir se hai āmāda-e-ulfat
har baar mohabbat meñ ḳhasāra nahīñ miltā

karam kiyā hai ġham-e-ishq ne mire dil meñ
maiñ kis tarah na karūñ pās-e-mehmāñ nāseh

tumhāre dil pe apnā naam likkhā ham ne dekhā hai
hamārī chiiz phir ham ko ināyat kyuuñ nahīñ karte

mirī dil kī tabāhī kī shikāyat par kahā us ne
tum apne ghar kī chīzoñ kī hifāzat kyuuñ nahīñ karte

gir chukā hai bahut der ab to sambhal
tere dil se jo nafrat na miT pā.egī

us kī to dil-āzārī be-hech hī thī yaaro
kuchh tum ko hamārī bhī taqsīr nazar aa.ī

ye ḳhāna hamesha se vīrān hai
kahāñ koī dil ke makāñ meñ rahā

ghaav bhī zarā taak ke yāroñ ne lagā.e
kuchh dil ko bhī nisbat thī bahut nok-e-sināñ se

ik gosha-e-dil us ko dikhāne kā nahīñ ye
mahram nahīñ karnā use ik sirr-e-nihāñ se

sarsabz rahe zaḳhm-e-junūñ jis kī badaulat
ik rabt to qaa.em hai adū-e-dil-o-jāñ se

vo dil apnā bahlāte haiñ is shām-o-sahar ke khel meñ ham
har sub.h dabāte haiñ jazbe har shaam vo fitna karte haiñ

zehn be-paikar huā aur aql be-manzar huī
dil to patthar ho chukā thā aañkh bhī patthar huī

zehn meñ aane lage phir nā-pasandīda ḳhayāl
vo kahānī kaise bhūleñ naqsh jo dil par huī

baat to jab hai shole nikleñ barbat-e-dil ke tāroñ se
shor nahīñ naġhme paidā hoñ teġhoñ kī jhankāroñ se