Tags-Dil

Thahar gayā ho na āvāz-e-pā tirī sun kar
so dil pe ra.asha-zada haath dhar ke dekhte haiñ

terā chehra na mirā husn-e-nazar hai sab kuchh
haañ magar dard-e-dil-e-ḳhāk-basar hai sab kuchh

tujh ko sochā to kho ga.iiñ āñkheñ
dil kā ā.īna ho ga.iiñ āñkheñ

jaane kis kis ko diye mere hazāroñ dil the
ye ḳhazāna mire siine ke khañDar se niklā

tīr-e-nazar se aisā maare dil kā panchhī taab na le
duniyā ghar ke sayyādoñ se us kā nishāna achchhā hai

shaiḳh to masjid meñ jaatā hai andar se dil kaalā hai
sachche aabid jahāñ khaḌe huuñ vo but-ḳhāna achchhā hai

na to kaam rakhiye shikār se na to dil lagā.iye sair se
bas ab aage hazrat-e-ishq-jī chale jā.iye ghar hī ko ḳhair se

palak pe aa ke sitāre ne dāstāñ kah dī
jo dil meñ aag hai us kā dhuāñ hai poshīda

ye zindagānī kisī kī yādoñ se muttasil hai
so us ke jaane pe dil mirā mujh se mushta.il hai

dil to tahzīb-e-anā kā hai parastār magar
kyā kare koī jo ho jaa.e ishāra us kā

dard ab dil kī davā ho jaise
zindagī ek sazā ho jaise

yuuñ ġham-e-dil kī zabāñ mahkī hai
nik.hat-e-zulf-e-dotā ho jaise

kitnā sunsān hai rasta dil kā
qāfila koī luTā ho jaise

ye dil aTke kā saudā hai ye dil aa.egā qissa hai
mohabbat kī nigāhoñ meñ nahīñ achchhā burā koī

samā kar dil meñ pardā hai nigāh-e-shauq se ya.anī
ḳhud apne aap se chhuptā hai ab kāfir-adā koī

'rishī' ham har kisī se haal dil kā kah nahīñ sakte
baḌī mushkil se miltā hai kahīñ dard-āshnā koī

dil kitnā farebī hai adākār na ho jaa.e
ye rauzan-dar-rauzan-e-dīvār na ho jaa.e

dil hai kisī ummīd ke saa.e meñ farozāñ
yak-tarfa tasallī kā sazā-vār na ho jaa.e

kahāñ kahāñ na nazar ne tumhārī kaam kiyā
utar ke dil meñ umīdoñ kā qatl-e-ām kiyā

dil lagā kar dukh uThā.e be-shumār
dam-shumārī bhī koī dam kar chuke