Tags-Dil

dil mirā tujh ġham siiñ ai jān-e-'sirāj'
beshtar be-tāb kal siiñ aaj hai

dil aur sham.a donoñ barābar haiñ soḳhta
uThtā hai kis jagah se dhuāñ dekhte raho

ġhārat-e-dil par TuuT paḌī hai
shyām-nagar kī kumārī āñkheñ

furqat kī bhayānak rātoñ ko is tarah guzārā kartā huuñ
dil mujh ko pukārā kartā hai maiñ tum ko pukārā kartā huuñ

tā.er-e-talab kī hai har uḌaan us dar tak
nā-murād dil kā har rāsta vahīñ pahuñche

har dil o nazar meñ ho ik nikhār sā paidā
bad-gumān zehnoñ tak nemat-e-yaqīñ pahuñche

kunj-e-dil meñ hai jo malāl uchhāl
raushnī ke kañval uchhāl uchhāl

dil rotā hai chehrā hañstā rahtā hai
kaisā kaisā farz nibhānā hotā hai

ek chhatrī meñ bacheñ ham dhuup se
jo pahal dil meñ hai vo saarī kareñ

is dil ko kisī dast-e-adā-sanj meñ rakhnā
mumkin hai ye mīzān-e-kam-o-besh jalā de

mire zavāl kī sab ko thī aarzū 'as.ad'
mire kamāl se ḳhush-dil magar koī bhī na thā

dil rahe piirī meñ bhī terā javāñ
āḳhirī dam tak yahī dam-ḳham rahe

chāhiye insān kā dil ho ġhanī
paas maal o zar bahut yā kam rahe

ishq ne jis dil pe qabza kar liyā
phir kahāñ us meñ nashāt o ġham rahe

vaqt raste meñ khaḌā hai ki nahīñ
dil se ab pūchh ḳhudā hai ki nahīñ

har kiran vaqt-e-sahar kahtī hai
rauzan-e-dil koī vā hai ki nahīñ

zaḳhm-e-dil manzil-e-jāñ tak aa.e
sañg-e-rah saath chalā hai ki nahīñ

kho ga.e raah ke sannāTe meñ
ab koī dil kī sadā hai ki nahīñ

zindagī zinda-dilī kā hai naam
murda-dil ḳhaak jiyā karte haiñ

kaisī bastī thī jahāñ par koī bhī aisā na thā
munkashif maiñ jis pe kartā apne dil kī baat ko