Tags-Dil

dil-e-mahzūñ kī aa.heñ mast kartī haiñ mujhe 'kaifī'
ki jab lī saañs maiñ ne mujh ko bū-e-zulf-e-yār aa.ī

kaise maiñ ḳhālī karā saktī thī ye dil apnā
ghar ke dīvār-o-dar-o-aks-o-makīñ us ke saath

havā jab le ke aatī hai gulābī ajnabī ḳhushbū
kalī sī dil meñ khiltī hai to un kī yaad aatī hai

nā-umīdāna bhī jiine kā salīqa hai hameñ
aa.ine TuuTe hue dil meñ sajā kar kyā kareñ

chand zarre dil ke raqsāñ haiñ fazāoñ meñ abhī
laao in zarroñ meñ hashr-e-ārzū barpā kareñ

ḳhūñ-chakāñ āñkhoñ se apnī ḳhush nahīñ ham bhī magar
chaak dāman ho to sī leñ chāk-e-dil ko kyā kareñ

āfiyat dushman thā dil-nā-āqebat-andesh ham
ab kise ilzām deñ 'aḳhtar' kise rusvā kareñ

mirā haal pūchh ke ham-nashīñ mire soz-e-dil ko havā na de
bas yahī duā maiñ karūñ huuñ ab ki ye ġham kisī ko ḳhudā na de

us sañg-dil ke dil meñ to naale ne jā na kī
kyā fā.eda jo aur ke jī meñ asar kiyā

taul ke beche the maiñ ne TukḌe sabhī
jaane kaise ye dil antulā rah gayā

tamām daulat-e-duniya-o-dīñ pe bhārī hai
vo dil jo basta-e-hubb-e-anām hai saaqī

ajab nahīñ ki tujhe bhī pasand aa.e ye qaul
jhuke na dil to ibādat harām hai saaqī

dil kā gulāb maiñ ne jise chuum kar diyā
us ne mujhe bahār se mahrūm kar diyā

in āñsuoñ se dil kī tapish aur baḌh ga.ī
bārish ne aur bhī mujhe maġhmūm kar diyā

go kaTe sar ki soz-e-dil joñ sham.a
ab to merī zabān se niklā

chashm-o-dil se jo niklā hijrāñ meñ
na kabhū bahr-o-kān se niklā

dil se mat jā ki haif us kā vaqt
jo koī us makān se niklā

unheñ mat dekheñ ahl-e-dil hiqārat kī nigāhoñ se
faqīrān-e-haram shahroñ pe sultānī bhī karte haiñ

shikāyat be-sabab karte haiñ apne gum-shuda dil kī
kabhī aap apnī chīzoñ kī nigahbānī bhī karte haiñ

itnā bhī intizār-e-dost haa.e ye e'tibār-e-dost
ai dil-e-be-qarār-e-dost dost pe iḳhtiyār kyā