Tags-Dil

chubh rahā thā dil meñ har dam kar rahā thā be-qarār
ik aziyyat-nāk pahlū jo mirī rāhat meñ thā

vo aa ga.e lo vo jī uThā maiñ adū kī ummīd-e-yās Thahrī
ajab tamāshā hai dil-lagī hai qazā khaḌī haath mal rahī hai

batāo dil duuñ na duuñ kaho to ajiib nāzuk mo.āmla hai
idhar to dekho nazar milāo ye kis kī shoḳhī machal rahī hai

roz o shab rahtā hai terī yaad meñ āshiq kā dil
go muqassir hai tirī ḳhidmat se go ma.azūr hai

vo dil jis ne hameñ rusvā kiyā thā
ham aaj us dil ko rusvā kar chuke haiñ

un ko dekhā to tabī.at meñ ravānī aa.ī
dil ke ujḌe hue gulshan pe javānī aa.ī

aarzū dil ko thī ai 'soz' ġhazal-ḳhvānī kī
raas aa.ī to hameñ marsiya-ḳhvānī aa.ī

chashm-e-dilbar ne dil-e-zār kī dildārī kī
aah bīmār ne bīmār kī ġham-ḳhvārī kī

chalo ab soch kar ye hī sharāfat se bichhaḌ jaa.eñ
ye dil-vil to javānī meñ sabhī ne hī lagāyā hai

hameñ to lag rahā thā ye ki ham gumnām haiñ lekin
kisī ne aaj phir darvāza dil kā khaTkhaTāyā hai

hamāre dil kā vo āñgan jahāñ taare na the kal tak
usī meñ chaudhvīñ kā chāñd puurā jagmagāyā hai

mere dil meñ bhī tapāñ haiñ valvale
kyuuñ mujhe be aarzū maanā gayā

haath maltā rah gayā shauq-e-junūñ
toḌ kar zanjīr-e-dil daanā gayā

koī zulf aḌe to bikhar jaanā koī lab dahkeñ to ThiThur jaanā
kyā tazkiyā karte ho dil kā ye ā.īna saaf nahīñ hotā

dil-e-ḳhūñ-gashta-e-jafā pe kahīñ
ab karam bhī garāñ na ho jaa.e

phir 'majāz' in dinoñ ye ḳhatra hai
dil halāk-e-butāñ na ho jaa.e

o dil toḌ ke jaane vaale dil kī baat batātā jā
ab maiñ dil ko kyā samjhā.ūñ mujh ko bhī samjhātā jā

kabhī kabhī tire dil tak pahuñch gayā mirā dard
kabhī huā to yahī ishq meñ gunāh huā

chāhā thā maiñ ne dil se kabhī tujh ko TuuT kar
vo hādisa hayāt kā unvān ho gayā

yuuñ naqāb-e-ruḳh-e-zebā bhī uThā dī kis ne
ḳhirman-e-dil pe ye bijlī sī girā dī kis ne