Tags-Dil

merī hastī meñ mirī ziist meñ shāmil honā
tujh ko ai husn mubārak ho mirā dil honā

kyā shauq kā aalam thā ki hāthoñ se uḌā ḳhat
dil thaam ke us shoḳh ko likhne jo lagā ḳhat

maiñ dil kī baat kahūñ yuuñ ki dil talak pahuñche
na hoñ kinā.e hī mub.ham na isti.āre adaq

vahī nahīñ thā jise dil talak rasā.ī thī
ki yuuñ to majma-e-ahbāb mere sāmne thā

haañ merī ye uljhan to har dil meñ khaTaktī hai
kuchh muḌ ke koī zulf-e-barham se nahīñ kahtā

dil ko nashāt-e-ġham se huuñ shādāñ kiye hue
mujh par firāq-e-yād hai ehsāñ kiye hue

aaheñ batā rahī haiñ ki derīna choT hai
chehra hai dil ke rañj ko uryāñ kiye hue

jaise ḳhizāñ-rasīda koī barg-e-dasht meñ
phirte haiñ dil meñ dard ko pinhāñ kiye hue

use kab hamārā ḳhayāl hai mire dil ko kyuuñ ye malāl hai
kabhī us ne aisā kahā nahīñ kabhī ham ne aisā sunā nahīñ

na raqīb hai na habīb hai mirā us se rishta ajiib hai
vo mile to dil ko sukūñ mile na mile to koī gila nahīñ

na aane ke un ke bahāne bhī dekhe
baḌe sañg-dil vo zamāne bhī dekhe

matā-e-dil hī bachī thī bas ik zamāne se
so ham ise bhī tirī anjuman meñ haar aa.e

nigāh-e-nāz mire dil ke ghaav par mat jā
ḳhudā kare ki tujhe apnā kārobār aa.e

ab kahāñ dil ke lahū meñ bhīgī bhīgī āgahī
jeb meñ ham bhī liye phirte haiñ māñge kā hunar

dil-sozi-e-vafā ko shakebā.ī kī atā
shā.istagī ye rañg-e-hinā kī thī kuchh dinoñ

us manzil-e-hayāt meñ ab gāmzan hai dil
'shiblī'! jahāñ kisī kī bhī āvāz-e-pā nahīñ

dil ke ujḌe nagar ko kar ābād
is Dagar ko bhī koī raahī de

khultā hai har ik shaḳhs ke qāmat ke barābar
ye dil hai koī kaaTh kā darvāza nahīñ hai

qarābat to mayassar hai magar ye dil kī tanhā.ī
mirī marzī se aa.ī hai mirī marzī se niklegī

dil-bastagī qafas se yahāñ tak huī mujhe
goyā kabhī chaman meñ merā āshiyāñ na thā