Tags-Dil

dhaḌke pal chhan sajan salone bin
dil hai be-dard bāñvarā kaisā

kamāl-e-ishq meñ bhī lazzat-e-majāz nahīñ
taḌap rahā huuñ magar dil meñ soz-o-sāz nahīñ

to kyuuñ vo garmī-e-mahfil vo dil-kashī na rahī
niyāz-mand agar jān-e-bazm-e-nāz nahīñ

abhī karam meñ yaqīnan sitam bhī shāmil hai
ki dil ma.āl-e-mohabbat se be-niyāz nahīñ

aks āñkhoñ meñ be-dhiyānī kā thā
yā sabab dil kī bad-gumānī kā thā

thā jo khaTkā sā har ghaḌī dil meñ
uzr bas us kī pāsbānī kā thā

tumhārī mashq-e-jafā ke sadqe buland haiñ dil ke hausle bhī
jahāñ jahāñ choT paḌ rahī hai vahāñ vahāñ muskurā rahā huuñ

kyā ḳhāk-e-dil kī aag jo sho.ala na de sake
jazbāt-e-mushta.il se pashemāñ nahīñ huuñ maiñ

mujhe milā hai vo rañgīn-adā muqaddar se
jo dil meñ jalva-numā bhī rahe chhupā bhī rahe

māyūs haiñ ehsās se uljhī huī rāheñ
paa.el dil-e-majbūr kī chhankā ke guzar jā

bujhtī hī nahīñ tishnagī-e-dil kisī sūrat
ai abr-e-karam aag hī barsā ke guzar jā

hai terī tamannā kā bas ek bharam qaa.em
ab varna mire dil meñ kyā dam nazar aatā hai

ishq kā iḳhtitām karte haiñ
dil kā qissa tamām karte haiñ

apne dil par hai iḳhtiyār hameñ
mulk kā intizām karte haiñ

dil se rañg-e-duī miTāte haiñ
zaḳhm kā iltiyām karte haiñ

ai 'sabā' kyuuñ kisī kā dil toḌeñ
ka.abe kā ehtirām karte haiñ

zabt se dil nazār rahtā hai
andarūnī buḳhār rahtā hai

yuuñ to dil ko kabhī qarār na thā
ab bahut be-qarār rahtā hai

dil toḌ ke ḳhamosh nazāroñ kā kyā milā
shabnam kā ye savāl hai aur chāñd raat hai

tirī nazar se tire dil tak aane jaane meñ
jo fāsle haiñ vo lagtā hai umr bhar hī ke haiñ