vo laḌkī vo ma.asūm alhaḌ sī laḌkī
kisī aarzū kī tarah dil-nashīñ thī
bahāroñ sitāroñ kā vo ḳhvāb lekin
nirālī hī ta.abīr meñ Dhal rahā hai
vo jalte hue kuchh pashemān bhī hai
nikhar bhī rahī hai magar is jalan se
nadāmat ke TuuTe hue āñsuoñ ne
tabassum ko ārāsta kar diyā hai
vo āzād panchhī jo Duubā huā thā
nashīle sajīle ḳhayāloñ ke ras meñ
jo doshīzgī nik.hat-e-rā.egāñ thī
baḌā kār-āmad dhuāñ ban rahī hai
kuñvārī umañgoñ kī muñh-band kaliyāñ
zar-o-sīm ke Dher meñ tul rahī haiñ
ḳhizāñ ke sunahrī fareboñ meñ aa kar
hayā kā muqaddas chaman luT rahā hai
vo alhaḌ sī laḌkī jo kuchh saal pahle
kisī aarzū kī tarah dil-nashīñ thī