raat oḌhe hue aa.ī hai faqīroñ kā libās

chāñd kashkol-e-gadā.ī kī tarah nādim hai

kaun ye vaqt ke ghūñghaT se bulātā hai mujhe

kis ke maḳhmūr ishāre haiñ ghaTāoñ ke qarīb

vo to tūfān thii, sailāb ne paalā thā use

us kī mad.hosh umañgoñ kā fusūñ kyā kahiye

raqs ab ḳhatm huā maut kī vaadī meñ magar

kisī paa.el kī sadā ruuh meñ tābinda hai

kaun jaane ki ye āvāra kiran bhī chhup jaa.e

kaun jaane ki idhar dhund kā bādal na chhaTe

zindagī niiñd meñ Duube hue mandir kī tarah

ahd-e-rafta ke har ik but ko liye suutī hai