ye daur-e-nau-mubārak farḳhanda-aḳhtarī kā

jamhūriyat kā āġhāz anjām qaisarī kā

bhārat kī bartarī meñ kis ko kalām hai ab

thā jo rahīn-e-pastī gardūñ-maqām hai ab

sadiyoñ ke band TuuTe āzād hoga.e ham

qaid-e-girāñ se chhūTe dil-e-shād ho ga.e ham

jo muztarib thī dil meñ vo aarzū bar aa.ī

takmīl-e-ārzū ne dil kī ḳhalish miTā.ī

ta.abīr-e-ḳhvāb-e-'gāñdhī' tafsīr-e-hāl-e-'nehrū'

'āzād' kī riyāzat 'sardār' kī tagāpū

qurbāñ hue jo is par rūheñ haiñ shaad un kī

ham jis se bahra-var haiñ vo hai murād un kī

āzād ho gayā jab hindostāñ hamārā

hai suud ke barābar har ik ziyāñ hamārā

aivān-e-farruḳhī kī tāmīr-e-nau mubārak

ā.īn-e-zindagī kī tadbīr-e-nau mubārak

bhārat kā azm hai ye taufīq ai ḳhudā de

duniyā se īn-o-āñ kī tafrīq ko miTā de