maiñ apne aap gum summun udaas vāmāñda
ye sochtā huuñ ki kyā haq hai mujh ko jiine kā
koī qarīb se dekhe to mere dāman meñ
shikāyateñ bhī bahut haiñ mohabbateñ bhī bahut
phir ik savāl hai bedār shab ke āñgan meñ
jo ḳhud hī jaag rahā ho udaas bistar par
ufuq ke paar nigār-e-sahar ko kyā ma.alūm
dayār-e-shab meñ guzartī hai zindagī kaise
kahūñ to kis se kahūñ ai mire but-e-ma.asūm
matā-e-qalb-o-nazar haar kar huā ma.alūm
jab āñsuoñ pe matā-e-vafā kā dhokā thā
to reg-e-dasht ke mānind ḳhushk thiiñ āñkheñ
mire liye yahī ġham haiñ yahī masā.il haiñ
maiñ rā.egāñ huuñ ki huuñ kāmrāñ nahīñ ma.alūm
isī ḳhayāl meñ jis vaqt niiñd aatī hai
mire lahū meñ mirī saañs meñ mire dil meñ
ye sochtā huuñ ki bedāriyoñ meñ ālam-e-ḳhvāb
azaab hai nafas-e-ātish-āshnā kā azaab