merī mahbūb ye aañsū haiñ ki motī ruḳh par

un ko is tarah na bekār gañvā maan bhī jā

ye nahīñ hai ki maiñ is dard se āgāh nahīñ

tū ġham-e-dahr pe rotī hai patā hai mujh ko

haañ magar ham hī nahīñ is ke shikanje ke shikār

apnī hī tarah zamāne meñ hazīñ aur bhī haiñ

haath par haath dhare sab hoñ agar girya-kunāñ

phir un ashkoñ kā kare kaun mudāvā āḳhir

aaj bebas haiñ to kyā aaj haiñ majbūr to kyā

bebasī hī pe nahīñ ḳhatm kahānī apnī

ḳhud-kushī qabr maiñ bhejegī hameñ ġham ko nahīñ

marg-e-hastī meñ kahāñ hai ġham-e-hastī kā ilaaj

ġham ke zarroñ ko sameTūñ ki baḌe kaam ke haiñ

ye simaT jaa.eñ to ho jaa.e himāla paidā