muddat ke ba.ad tum se milā huuñ to ye khulā
ye vaqt aur fāsla dhoka nazar kā thā
kaisī ajiib sā.at-e-dīdār hai ki ham
phir yuuñ mile ki jaise kabhī duur hī na the
ma.asūm kis qadar thiiñ vo be-nām chāhateñ
bachpan se ham-kanār thā ahd-e-shabāb bhī
phir vo havā chalī ki sabhī kuchh bikhar gayā
vo mahfileñ vo dost vo gul-rañg qahqahe
ab tum milīñ to kitne hī ġham haiñ tumhāre saath
patthar kī tarah tum ne gizārī hai zindagī
maiñ ne bhī ek johd-e-musalsal meñ kaaT dī
vo umr thī jo phuul se armāñ liye hue
ab apne apne ḳhuuñ kī amānat hai aur ham
aur in amānatoñ kī hifāzat ke ḳhvāb haiñ
kis ko ḳhabar thī lamha ik aisā bhī aa.egā
maazī tamām phir simaT aa.egā haal meñ
tum bhī vahī ho maiñ bhī vahī vaqt bhī vahī
haañ ik bujhī bujhī sī chamak chashm-e-nam meñ hai