ra.ad huuñ barq huuñ bechain huuñ paarā huuñ maiñ
ḳhud-parastār ḳhud-āgāh ḳhud-ārā huuñ maiñ
merī fariyād pe ahl-e-duval añgusht-ba-gosh
laa, tabar ḳhuun ke dariyā meñ nahāne de mujhe
sar-e-pur-naḳhvat-e-arbāb-e-zamāñ toḌūñgā
shor-e-nāla se dar-e-arz-o-samāñ toḌūñgā
toḌ Dālūñgā maiñ zanjīr-e-asīrān-e-qafas
dahr ko panja-e-usrat se chhuḌāne de mujhe
barq ban kar but-e-māzī ko girāne de mujhe
rasm-e-kohna ko tah-e-ḳhāk milāne de mujhe
aag huuñ aag huuñ haañ ek dahaktī huī aag
aag huuñ aag bas ab aag lagāne de mujhe