apnī aur 'qayyūm-rāhī' kī maañ kī maut par
sitāre chup haiñ kisī beva maañg kī mānind
muhīb-o-sarv-o-siyah haath baḌhte jaate haiñ
khiñche hue haiñ fazāoñ meñ ātishīñ ḳhanjar
havā.eñ detī haiñ dastak mire darīchoñ par
mujhe ye Dar hai na bujh jaa.e terī sham-e-hayāt
na jaane kyā mire allāh hone vaalā hai
muhīb saaya añdhere meñ thartharātā hai
ye kis ne bāñhoñ meñ ghabrā ke bhar liyā tujh ko
ki jaise dev ho shahzāde ke fasānoñ kā
phir is tarah se tirā paikar-e-nahīf uḌā
ki jaise gard koī āñdhiyoñ ke saath chale
har ek shahr meñ tanhā galī galī tanhā
maiñ phir rahā huuñ tire ġham kī laash uThā.e hue