mere gītoñ meñ mohabbat ne jalā.e haiñ charāġh
aur yahāñ zulmat-e-zardār ke ghere haiñ tamām
ai mire giit! kahīñ aur hī chalnā hogā

tujh ko ma.alūm nahīñ aadam o havvā kī zamīñ
apne nāsūr ko parde meñ chhupāne ke liye
ai mire giit! kahīñ aur hī chalnā hogā

aa kahīñ aur kisī desh ko DhūñDeñ chal kar
ho jahāñ bhuuk na afkār ke pardoñ pe muhīt
ai mire giit! kahīñ aur hī chalnā hogā

ye bhī mumkin hai ki jholī meñ amal kī ik roz
yaas kī ḳhaak ho aur duur ho apnī manzil
ai mire giit kahīñ aur hī chalnā hogā