jab chhalakte haiñ zar-o-sīm ke gaate hue jaam
ek zahrāb sā māhaul meñ ghul jaatā hai
maiñ ne dekhā hai ki aflās ke sahrāoñ meñ
qāfile azmat-e-ehsās ke ruk jaate haiñ
jin usūloñ se ibārat hai mohabbat kī asaas
un usūloñ ko yahāñ toḌ diyā jaatā hai
maiñ ne jo raaz zamāne se chhupānā chāhā!
tū ne āfāq pe us raaz kā dar khol diyā
aaj aflās ne khaa.ī hai zar-o-sīm se maat
is meñ lekin tire chilloñ kā koī dosh nahīñ
rahguzāroñ ke dhundalke to zarā chhaT jaa.eñ
apne talvoñ se ye kāñTe bhī nikal jā.eñge