jab ḳhat meñ tum likh detī ho kuchh haal apnī bīmārī kā
maiñ baiTh ke tanhā.ī meñ jaane kyā kyā sochā kartā huuñ
kuchh andhe koḌhī dīvāne āñkhoñ meñ samāne lagte haiñ
kuchh qaht-zada bhūke pyāse jaañ ḳhāmoshī se de de kar
is dard kī maarī duniyā meñ aise insāñ kyuuñ baste haiñ
jo saarī umar zarūrat kī chīzoñ ke liye bhī taraste haiñ
lekin majbūr insānoñ ko kyuuñ haq nahīñ hāsil jiine kā
tūfān hī ke qabze meñ kyuuñ patvār hai un ke safīne kā
phir ḳhud hī dil bol uThtā hai ab vaqt badalne vaalā hai
zarre sūraj ban jā.eñge vo daur bhī aane vaalā hai
jaañ vaqf-e-tapish ho jaatī hai aur azm-e-baġhāvat kartī hai
us vaqt ik sail irādoñ kī sīnoñ se ho ke guzartī hai
ham jañg kareñge fitrat se fitrat par qaabū pā.eñge
aur fitrat par qaabū pā kar ik roz amar ban jā.eñge