phir usī vādi-e-shādāb meñ lauT aayā huuñ
jis meñ pinhāñ mire ḳhvāboñ kī tarab-gāheñ haiñ
sabz khetoñ meñ ye dubkī huī doshīzā.eñ
in kī shiryānoñ meñ kis kis kā lahū jaarī hai
haa.e vo garm o dil-āvez ubalte siine
jin se ham satvat-e-ābā kā sila lete haiñ
ye lahakte hue paude ye damakte hue khet
pahle ajdād kī jāgīr the ab mere haiñ
in kī mehnat bhī mirī hāsil-e-mehnat bhī mirā
in ke baazū bhī mire quvvat-e-bāzū bhī mirī
maiñ un ajdād kā beTā huuñ jinhoñ ne paiham
ajnabī qaum ke saa.e kī himāyat kī hai
ḳhaak par reñgne vaale ye fasurda Dhāñche
in kī nazreñ kabhī talvār banī haiñ na banīñ
haa.e ye shaam ye jharne ye shafaq kī laalī
maiñ in āsūda fazāoñ meñ zarā jhuum na luuñ