apne maazī ke tasavvur se hirāsāñ huuñ maiñ
apne guzre hue ayyām se nafrat hai mujhe
mere maazī ko andhere meñ dabā rahne do
merā maazī mirī zillat ke sivā kuchh bhī nahīñ
kitnī be-kār umīdoñ kā sahārā le kar
maiñ ne aivān sajā.e the kisī kī ḳhātir
mujh se ab merī mohabbat ke fasāne na kaho
mujh ko kahne do ki maiñ ne unheñ chāhā hī nahīñ
mujh ko kahne do ki maiñ aaj bhī jī saktā huuñ
ishq nākām sahī zindagī nākām nahīñ
vahī gesū vahī nazreñ vahī aariz vahī jism
maiñ jo chāhūñ to mujhe aur bhī mil sakte haiñ