sunā hai tum manoñ miTTī tale ārām kartī ho
tum aur ārām nā-mumkin
qasam in khurdure hāthoñ kī
maiñ jin meñ qalam pakḌe hue huuñ
sunā hai jis ghaḌī duniyā meñ maiñ aa.ī
tumhīñ ne shahd bhī mujh ko chaTāyā
vo pahlā shahd kā qatra
mire sheroñ meñ ras ban kar mahaktā hai
vo kājal reshmī uñglī se jo tum ne lagāyā thā
mirī āñkhoñ meñ aisā nuur laayā
tarā.ī ke bahut chhoTe se qasbe ke
kisī ḳhāmosh āñgan meñ
kabhī tum apne pahlū meñ liTā kar
āsmāñ ke nit-na.e asrār samjhātīñ
kabhī tum dil-nashīñ āvāz meñ lorī sunātī thiiñ
magar maiñ bhī tumhārī hī tarah kī ek ziddī thī
vo ik nā-bīnā buḌhiyā
jis ke TuuTe jhoñpaḌe meñ
mohalle meñ koī bachcha jo aadhī raat ko rotā
to tum bechain hī rahtī thiiñ jab tak ho na aatī thiiñ
kahā jaatā hai tum dushman banāne meñ bhī māhir thiiñ
harīs aisī
sunā ye hai tumheñ qur.ān bhī achchhī tarah paḌhnā na aatā thā
magar maiñ ne to ye dekhā
tumhāre haath ke mīThe malīde meñ
jo dargāhoñ kī ḳhushbū thī
tumhāre pople hoñToñ kā nāzuk ḳham
ik aisā harf-e-abjad thā
kabhī qirtās par tum jhurriyoñ meñ jhilmilātī ho
hamesha kī tarah se mīThe mīThe muskurātī ho